नयाँ दिल्ली, २९ सेप्टेम्बर (हि.स.)। केन्द्रिय गृहमन्त्री अमित शाहले मंगलवार दिल्लीमा बारापुला एलिभेटेड करिडोर फेज–३ र मुकरबा चौक अन्डरपासको उद्घाटन गरेका छन्। यस क्रममा उनले मोदी मिल फ्लाइओभरलाई कालकाजीसम्म विस्तार गर्ने तथा सावित्री सिनेमा नजिक नयाँ फ्लाइओभर निर्माणको आधारशिला पनि राखे। यी परियोजनाको उद्देश्य दिल्लीका विभिन्न क्षेत्रमा यातायात सहज बनाउनु तथा प्रमुख चौकमा हुने जामको दबाब कम गर्नु हो।

बारापुला फेज–३ को ३.५ किलोमिटर लामो एलिभेटेड करिडोरले मयुर विहार फेज–१ लाई सराय काले खाँसँग जोड्नेछ। यो विद्यमान बारापुला करिडोरसँग जोड़िएर लगभग ९ किलोमिटर लामो सिग्नलरहित मार्गको हिस्सा बन्नेछ। यसबाट पूर्वी दिल्लीबाट दक्षिण दिल्ली र एम्सतर्फ आवाजाही गर्ने यात्रुलाई राम्रो सम्पर्क सुविधा उपलब्ध हुने अपेक्षा गरिएको छ।

अधिकारीहरू अनुसार, मयुर विहार र नोएडातर्फबाट सराय काले खाँ हुँदै दक्षिण दिल्ली तथा एम्सतर्फ जान लाग्ने समय लगभग ३५–४५ मिनेटबाट घटेर लगभग १५ मिनेट हुनसक्छ। परियोजनामा आठ वटा र्याम्प सहित साइकल मार्ग, पैदलयात्रीका लागि सुविधा तथा यमुनामाथि एक्स्ट्रा–डोज्ड पुल पनि समावेश छन्।

बारापुला फेज–३ परियोजनालाई २०१४ मा स्वीकृति दिइएको थियो र निर्माण कार्य २०१५ मा शुरु भएको थियो। यसलाई मूल रूपमा २०१७ सम्म पूरा गर्ने लक्ष्य राखिएको थियो। तर विभिन्न कारणले लामो समयसम्म ढिलाइ हुँदा लागत पनि बढ़ेको थियो। परियोजनाको प्रारम्भिक अनुमानित लागत १,२६०.६३ करोड़ रुपियाँ थियो, जसलाई पछि संशोधन गरी लगभग १,६३५ करोड़ रुपियाँ पुर्याइएको थियो। दिल्ली सरकारले मार्च २०२६ मा परियोजनाको संशोधित लागत १,६३५.०३ करोड़ रुपियाँ स्वीकृत गरेको थियो।

मुकरबा चोक अन्डरपासमा तीनव टा अन्डरपास समावेश छन्। बाहिरी रिङ रोड र राष्ट्रिय राजमार्ग–४४ बाट आउने–जाने यातायात सहज बनाउने उद्देश्यले यसको निर्माण गरिएको हो। यो सञ्चालनमा आएपछि उक्त प्रमुख चौकको यातायात व्यवस्थामा सुधार हुने अपेक्षा गरिएको छ।

यस अवसरमा दिल्लीकी मुख्यमन्त्री रेखा गुप्ताले आम आदमी पार्टीको अघिल्लो सरकारमाथि टिप्पणी गर्दै त्यसको कार्यकालमा विकास परियोजनाहरू ‘अड्किएका, रोकिएका र दिशाहीन भएका’ बताइन्। उनले आफ्नो सरकारले पेन्डिङ परियोजना पूरा गर्न जोड दिइरहेको बताइन्। मुख्यमन्त्रीले बारापुला परियोजनाको उल्लेख गर्दै यसलाई मूल रूपमा २०१७ सम्म पूरा गर्ने लक्ष्य रहे पनि लामो समयसम्म ढिलाइ भएको बताइन्।

मोदी मिल फ्लाइओभरलाई कालकाजीसम्म विस्तार गर्ने र सावित्री सिनेमा नजिक नयाँ फ्लाइओभर निर्माण गर्ने दुई परियोजनाको संयुक्त अनुमानित लागत लगभग ३७१.७५ करोड़ रुपियाँ रहेको बताइएको छ। यी परियोजनाको उद्देश्य मोदी मिल, कालकाजी, सावित्री सिनेमा तथा वरपरका प्रमुख मार्गमा यातायात सहज बनाउनु हो।

हिन्दुस्थान समाचार / भवानी थामी