चेन्नई, २९ सेप्टेम्बर (हि.स.)। निजी बसमा पनि महिलाका लागि निःशुल्क यात्रा योजना लागू गर्नुपर्ने माग गर्दै तमिलनाडु निजी बस मालिक महासंघले ३० सेप्टेम्बरमा २४ घण्टे सांकेतिक हड़तालको घोषणा गरेको छ। महासंघ अनुसार, ३० सेप्टेम्बर राति १२ः०१ बजीदेखि राति ११ः५९ बजीसम्म राज्यभरि निजी बस सञ्चालन बन्द रहनेछ।

निजी बस मालिकहरूले सरकारी बसमा महिलालाई निःशुल्क यात्रा सुविधा दिइएझैं निजी बसमा पनि महिला, तेस्रोलिंगी र दिव्याङ्गलाई निःशुल्क यात्रा सुविधा दिनुपर्ने माग गरेका छन्। निःशुल्क यात्राका कारण हुने आम्दानीको क्षतिपूर्ति गर्न तमिलनाडु सरकारले निजी बस सञ्चालकलाई अनुदान दिनुपर्ने माग पनि उनीहरूले गरेका छन्।

महासंघ अनुसार, निजी बस क्षेत्रसँग लगभग तीन लाख परिवार जोड़िएका छन्। निजी बस मालिकहरूले जिल्लाबीच चल्ने सरकारी बसमा निःशुल्क यात्रा योजना लागू हुँदा निजी बस सेवामा आर्थिक असर पर्नसक्ने बताएका छन्। निजी बसलाई पनि योजनामा समावेश गरिए सरकारले आम्दानीको क्षतिपूर्तिका लागि आर्थिक सहयोग गर्नुपर्ने उनीहरूको भनाइ छ।

तमिलनाडुका महानगरमा साधारण सरकारी बसमा महिलाका लागि निःशुल्क यात्रा योजना यसअघि नै लागू छ। त्यस्तै, टीभीकेको चुनावी वाचाअनुसार जिल्लाबीच चल्ने बसमा पनि महिलालाई निःशुल्क यात्रा सुविधा दिने घोषणा गरिएको थियो। त्यसपछि मुख्यमन्त्री विजयले सत्ता सम्हालेपछि पहिलो विधानसभा अधिवेशनमा नियम नम्बर ११० अन्तर्गत ‘वेत्री पयनम’ अर्थात् ‘सफल यात्रा’ योजनाको घोषणा गरेका थिए।

घोषित योजना अनुसार, महात्मा गान्धीको जयन्तीका अवसरमा २ अक्टोबरदेखि एक्सप्रेस, डिलक्स तथा उपनगरीय बसमा महिलालाई निःशुल्क यात्रा सुविधा दिने बताइएको छ। निजी बस मालिकहरू अनुसार, चेन्नई बाहेक तमिलनाडुका अधिकांश जिल्लामा ठूलो संख्यामा निजी बस सञ्चालन हुने भएकाले नयाँ योजनाको असर यी सेवामा पर्नसक्छ।

निजी बस मालिक महासंघले महिलालाई निःशुल्क यात्रा सुविधा दिन आफूहरू तयार रहेको तर योजना निजी बससम्म विस्तार गर्दा सरकारले अनुदान पनि दिनुपर्ने जनाएको छ। यही माग सरकारसमक्ष राख्न ३० सेप्टेम्बरमा तमिलनाडुभरि २४ घण्टा निजी बस सञ्चालन बन्द गर्ने निर्णय गरिएको हो।

हिन्दुस्थान समाचार / भवानी थामी