वासिङ्टन, 0४ सेप्टेम्बर (हि.स.)। अमेरिकाका उपराष्ट्रपति जेडी भान्सले इरानसँगको युद्ध अन्त्य हुने कुनै निश्चित समयसीमा नरहेको बताएका छन्। उनले करिब छ महिनाअघि अमेरिका-इजरायलको संयुक्त हवाई हमलाबाट शुरु भएको यस संघर्ष अन्त्य गर्ने विषय इरानमै निर्भर रहेको बताए। भान्सले वर्तमान अवस्थालाई “युद्ध” पनि भन्न नहुने धारणा राख्दै “सक्रिय लडाइँ” केही महिनाअघि नै समाप्त भइसकेको बताए।

सीएनएनको रिपोर्टअनुसार, भान्सले बिहीबार ह्वाइट हाउसमा आयोजित एक कार्यक्रममा इरानसँगको युद्धबारे यस्तो प्रतिक्रिया दिएका हुन्। उनले अहिले इरानी पक्षसँग कुनै वार्ता नभएको बताए। उनले भने, “राष्ट्रपतिको धारणा बिल्कुल स्पष्ट छ। हामी इरानसँग कुरा गरिरहेका छैनौँ र उनीहरूले व्यावसायिक जहाजमाथि गोली चलाउन बन्द नगरेसम्म हामी उनीहरूसँग कुरा गर्ने छैनौँ।”

एक प्रश्नको जवाफमा भान्सले आगामी नोभेम्बर ३ मा हुने निर्वाचनसम्म संघर्ष समाप्त हुन्छ कि हुँदैन भन्ने बताउन सकेनन्। उनले भने, “जब तपाईं युद्ध कहिले समाप्त हुन्छ भनेर सोध्नुहुन्छ, तपाईं मलाई इरानीहरूले जहाजमाथि गोली चलाउन कहिले बन्द गर्छन् भनेर सोधेझैँ प्रश्न गरिरहनुभएको हुन्छ। मलाई लाग्छ वास्तविकता के हो भने, मलाई यस प्रश्नको उत्तर थाहा छैन। तपाईंले इरानीहरूलाई सोध्नुपर्छ।”

उपराष्ट्रपति भान्सले ग्यासको मूल्य कहिले सस्तो हुन सक्छ भन्नेबारे पनि कुनै निश्चित जवाफ दिन सकेनन्। उनले भने, “यसको मूल्य कहिलेसम्म घट्छ भनेर म वाचा गर्न गइरहेको छैन। म यति मात्र भन्न चाहन्छु कि हामीले यो किन गरिरहेका छौँ भन्ने कुरा सम्झनुपर्छ। पहिलो कुरा, यस्तो गर्नुको उद्देश्य इरानसँग कहिल्यै पनि आणविक हतियार नहोस् भन्ने हो।”

हिन्दुस्थान समाचार / बिशाल