वासिङ्टन, 0४ सेप्टेम्बर (हि.स.)। इरानमा जारी लामो युद्धका कारण अमेरिकाको रक्षा भण्डारमा बढ्दो दबाउबीच अमेरिकी राष्ट्रपति डोनाल्ड ट्रम्पले अमेरिकाले युक्रेनलाई उपलब्ध गराएका हतियार र गोलाबारुदको लागत युरोपेली सहयोगी राष्ट्रहरूबाट असुल्ने घोषणा गरेका छन्।

ट्रम्पले ‘ट्रुथ सोशल’ मा लगातार पोस्ट गर्दै पूर्वराष्ट्रपति जो बाइडेनमाथि “सयौँ अरब डलर” मूल्यका हतियार युक्रेन र नाटोलाई “निःशुल्क” उपलब्ध गराएको आरोप लगाए। उनले यस कदमलाई बाइडेनको कुप्रबन्धन नीतिमा सुधारको प्रयास भएको बताउँदै भने, “हामी त्यो पैसा माग्नेछौँ, ढिलो भए पनि।”

अमेरिकी सैन्य भण्डारमा कमी देखिइरहेका बेला ट्रम्पको यस्तो बयान आएको हो। ‘सेन्टर फर स्ट्राटेजिक एन्ड इन्टरनेसनल स्टडिज’ का अनुसार, इरानमा द्वन्द्व शुरु भएयता पेन्टागनले करिब १,५०० प्याट्रियट एयर डिफेन्स इन्टरसेप्टर प्रयोग गरिसकेको छ। यसका कारण भण्डार घटेर १,००० भन्दा कम भएको छ। ‘टर्मिनल हाई एल्टिट्युड एरिया डिफेन्स’ (थाड) इन्टरसेप्टरको भण्डार पनि ४५२ बाट घटेर ३०० भन्दा कम भएको छ।

यी तथ्यांकका बावजुद ट्रम्पले हतियारको भण्डारमा कमी आएको रिपोर्टलाई “देशद्रोही” भन्दै अमेरिकासँग “मध्यम र उच्च श्रेणीका गोलाबारुदको लगभग असीमित मात्रा” रहेको दाबी गरेका छन्। उनले घरेलु आवश्यकतालाई प्राथमिकता दिँदै प्रशासनले सैन्य भण्डार पुनः भरिरहेको बताए।

ट्रम्पले आरोप लगाउँदै भने, “हामीसँग गोलाबारुद छैन भनेर भनिरहने मानिसहरू र सञ्चारमाध्यम वास्तवमा देशद्रोही हुन्।”

विश्लेषकहरूका अनुसार, युक्रेनलाई सैन्य सहायता जारी राख्दै इरानमा महँगो युद्ध सञ्चालन गर्नु वासिङ्टनका लागि दोहोरो चुनौती बनेको छ। विशेषज्ञहरूले दुई मोर्चामा गोलाबारुदको उच्च मागले ट्रान्सएटलान्टिक साझेदारीको दिशामा परिवर्तन ल्याउन सक्ने र युरोपलाई थप जिम्मेवारी वहन गर्न बाध्य पार्न सक्ने चेताउनी दिएका छन्।

हिन्दुस्थान समाचार / बिशाल