कुरनुल, २४ अक्टोबर (हि.स.)। आन्ध्र प्रदेशको कुरनुल जिल्लाको उल्लिन्डकोंडा चौकमा एउटा ठूलो सडक दुर्घटना भएको छ। बेङ्गलुरुबाट हैदराबाद जाँदै गरेको कावेरी ट्राभल्सको बसमा आगो लाग्यो। बस पूरै जलेर खरानी भएको छ र त्यसमा सवार यात्रुहरू पनि आगोको चपेटामा परेका छन्।घटनाको समयमा बसमा करिब ४० जना यात्रु सवार रहेको बताइएको छ।
१२ जना यात्रु बसबाट निस्कन सफल भए र बाँकी यात्रु बसभित्रै अड्किए। घटना बिहान करिब ३:३० बजे भएको बताइएको छ। प्रत्यक्षदर्शीहरूका अनुसार, बस एउटा दुईचक्के सवारीसँग ठोक्किएपछि आगो लागेको थियो।
यो दुर्घटनामा धेरै यात्रुको मृत्यु भएको आशंका गरिएको छ। घाइतेहरूलाई कुरनुलको सरकारी अस्पतालमा लगिएको छ। यद्यपि, बस चालक र उसका सहायक दुबैजना आगोबाट ज्यान जोगाउन सफल भएका छन्।
प्रत्यक्षदर्शीहरूका अनुसार, आपतकालीन ढोका तोडेर १२ जना यात्रु सुरक्षित बाहिर निस्किए र उनीहरूलाई सामान्य चोटपटक लागेको छ। उनीहरूलाई कुरनुल जनरल अस्पतालमा उपचारका लागि पुर्याइएको छ।
जहाँ दुर्घटना भएको थियो, त्यहाँ तीव्र वर्षा भइरहेको थियो। सूचना पाउनसाथ पुलिस घटनास्थलमा पुगेको र उद्धार कार्य सुरु गरेको बताइएको छ। दमकलकर्मीहरू पनि तुरुन्तै घटनास्थल पुगे र आगो निभाए। दुर्घटना त्यतिबेला भएको हो जब बस केही मिनेटमै कुरनुल सहर पुग्न लागेको थियो।
अधिकांश यात्रु हैदराबाद शहरका थिए। दुर्घटनाको समयमा राजमार्गमा गुज्रिरहेका अन्य सवारीका यात्रुले पनि सहयोग गरेका थिए। हिन्दुपुरका नवीनले बस दुर्घटनामा घाइते भएका छ जना यात्रुलाई आफ्नो कारमा राखी कुरनुल अस्पताल पुर्याए।
यसै क्रममा पुट्टपर्तीबाट हैदराबाद जाँदै गरेकी हैमा रेड्डीले बसमा आगो लागेको देखेपछि आफ्नो सवारी रोकिन् र तुरुन्तै प्रहरी र जिल्ला प्रशासनलाई खबर गरिन्। त्यसपछि पुलिस घटनास्थलमा आइपुगेको र उद्धार कार्य सुरु गरेको बताइएको छ।
रामिरेड्डी, वेणुगोपाल रेड्डी, सत्यनारायण, श्रीलक्ष्मी, नवीन कुमार, अखिल, जश्मिता, अकीरा, रमेश, जयसूर्या र सुब्रमण्यम नामका केही यात्रुहरू यस दुर्घटनाबाट बच्न सफल भएका छन्। २० जनाको मृत्यु भएको आशंका गरिएको छ र यसबारे आधिकारिक पुष्टि जिल्ला प्रशासनबाट हुन बाँकी छ।
---------------
हिन्दुस्थान समाचार / बिशाल
