गान्तोक, 24 अक्टूबर (हि.स.)।सिक्किम क्रान्तिकारी मोर्चा (एसकेएम) पार्टीले विपक्षी पार्टीहरूमाथि सामाजिक सञ्जालहरू मार्फत भ्रामक आरोपहरू लगाएको भन्दै कडा शब्दमा भर्त्सना गरेको छ। सिक्किम डेमोक्रेटिक फ्रन्ट (एसडीएफ) र सिटिजन एक्सन पार्टी (सीएपी) एउटै सिक्काका दुई पाटा हुन् भन्ने प्रष्टिएको दाबी गर्दै उनीहरूले एसकेएम पार्टीमाथि ‘फेक आईडी सञ्चालन’ र ‘विपक्षी महिला नेतृहरूलाई समाजिक सञ्जालमा अपमान गरेको’ भन्ने आरोप लगाएको एसकेएमले बताएको छ।
एसकेएम प्रचार प्रसार अध्यक्ष रञ्जना प्रधानद्वारा आज जारी प्रेस विज्ञप्तिमा यी सबै आरोपहरू पूर्ण रूपमा आधारहीन, भ्रामक र राजनीतिक रूपमा प्रेरित रहेको बताइएको छ। विज्ञप्तिमा भनिएको छ, एसकेएम पार्टी हरेक प्रकारका अपमानजनक व्यवहार, मानहानी, दुर्व्यवहार र समाजिक सञ्जालको दुरुपयोगको दृढतापूर्वक विरोध गर्दछ। हामी सुरुदेखिनै ‘फेक आईडी’ र ‘कीर्ते पर्चा संस्कृतिको’ विरुद्धमा अडिग रहेका छौँ। हाम्रो सिद्धान्त पारदर्शिता, मर्यादा र जिम्मेवार संवादमा आधारित छ।
एसकेएम अनुसार, एसडीएफ शासनकालमा नै ‘फेक आईडी’ सञ्चालन, कीर्ते पर्चा वितरण, गलत सूचना फैलाउने र चरित्रहत्या गर्ने संस्कृतिको सुरुवात भएको कुरा जनताले राम्ररी बुझेका छन्। सीएपी पनि उही बाटोमा हिँडिरहेको छ र अहिलेका दिनमा ‘फेक आईडी’ र ‘मर्फ गरिएको भिडियो–फोटो’ मार्फत भ्रम फैलाउने कामको नेतृत्व गरेर जनतालाई भ्रममा पार्ने कोशिशमा लिप्त छ।
एसकेएमले भनेको छ, एसडीएफ सत्तामा हुँदा कसरी विपक्षी पार्टीहरूलाई ‘कीर्ते पर्चा’ र ‘फेक आईडी’मार्फत बदनाम गर्ने गर्थ्यो भन्ने जगजाहेर छ र आज पनि त्यो प्रवृत्तिलाई नछोड़ेको स्पष्ट देखिएको छ। आज पनि नारीहरूको चरित्र हत्या गर्ने कुत्सित प्रयास गर्ने एसडीएफ र सीएपीका नेताहरूले नै नारी सम्मान र अधिकारको कुरा गर्नु आफैँमा बेमेल बनेको छ। आजको एसडीएफ र सीएपीलाई न जनताको समर्थन छ, न नै कुनै ठोस मुद्दा । एसकेएम पार्टीको छवि धूमिल पार्ने प्रयास गर्नु नै उनीहरूको ‘ड्रामा राजनीति’ को एउटै उद्देश्य हो।
हिन्दुस्थान समाचार / बिशाल
