गान्तोक, 26 अक्टूबर (हि.स.)। सर टाशी नामग्याल वरिष्ठ माध्यमिक विद्यालय, गान्तोकका टीएनएआईट्स पूर्व विद्यार्थी सङ्घले आज विद्यालय परिसरमा छोग्याल सर टाशी नामग्यालको १३२औं जन्मजयन्ती श्रद्धापूर्वक मनायो।

कार्यक्रममा विद्यालयकी प्रधानाध्यापिका डा. सरोजा प्रधान, शिक्षक तथा पूर्व विद्यार्थी सङ्घका वरिष्ठ सदस्यहरूको उपस्थिती रहेको थियो।

यस अवसरमा सङ्घका अध्यक्ष कुञ्जाङ ग्यात्सोले छोग्याल सर टाशी नामग्याल, जो यस विद्यालयका संस्थापक थिए, सिक्किमको शिक्षा क्षेत्रको विकासमा पुर्याएका अमूल्य योगदानको चर्चा गरे। उनले भने, “छोग्याल सर टाशी नामग्यालको मूर्ति उनको दूरदृष्टि र तत्कालीन सिक्किमको शिक्षा प्रणालीमा दिनुभएको योगदानको सम्मानका रूपमा स्थापना गरिएको हो। आज हामी सबै शिक्षित र समाजका उत्तरदायी सदस्य उहाँकै दूरदर्शी सोचको प्रतिफल हौं।”

वरिष्ठ सदस्य रमेश पेरीवालले पनि आफ्नो श्रद्धा व्यक्त गर्दै भने, “हामी आज जुन अवस्थामा छौं, त्यो छोग्याल सर टाशी नामग्याल र शिक्षाप्रति उहाँको समर्पणकै कारण हो।”

कार्यक्रमको क्रममा युवा स्पोर्ट्स क्लबद्वारा शुरु गरिएको युवा क्रिकेट खेलाडीहरूका लागि नयाँ नेट प्र्याक्टिस फेसिलिटी विद्यालय परिसरमै उद्घाटन गरिएको थियो।

छोग्याल सर टाशी नामग्याल, जो सिक्किमका १२औं राजा थिए, २६ अक्टोबर सन् १८९३ मा जन्मिएका थिए। विद्यालय परिसरमा उनको प्रतिमा गत वर्ष स्थापित गरिएको हो भने जन्मजयन्ती समारोह टीएनएआईट्स पूर्व विद्यार्थी सङ्घद्वारा आयोजना गरिएको दोस्रो वर्ष हो।

---------------

हिन्दुस्थान समाचार / बिशाल