21 देखि 22 नोभेम्बरसम्म सिलगढ़ीमा 'सिक्किम माछा महोत्सव' आयोजना गरिने

गान्तोक, 13 नोभेम्बर (हि.स.)। मुख्यमन्त्री प्रेमसिंह तामाङले आगामी २१ र २२ नोभेम्बर, २०२५ का दिन सिलगढ़ीको भेगा सर्कलमा आयोजना हुने 'सिक्किम माछा महोत्सव २०२५' को आधिकारिक ब्यानर अनावरण गरे। यो कार्यक्रम सिक्किम सरकारको मत्स्यपालन विभागले विश्व मत्स्यपालन दिवस मनाउन तथा जलचर र मत्स्यपालन विकासमा राज्यले गरेको प्रगति प्रदर्शन गर्न आयोजना गरिरहेको मत्स्यपालन विभागले जनाएको छ।

ब्यानर अनावरण समारोह मुख्यमन्त्रीको सरकारी निवास मिन्तोकगाङमा भएको थियो। यस अवसरमा मत्स्यपालन विभाग मन्त्री पुरन कुमार गुरुङ, विभागका सल्लाहकार एम प्रसाद शर्मा, विभागकी सचिव रोशनी राई, निर्देशक केके श्रेष्ठ र संयुक्त निर्देशक लोब्साङ तामाङ उपस्थित थिए।

विभाग अनुसार, सिक्किम माछा महोत्सवले हिमालयन रेन्बो ट्राउट, स्थानीय रूपमा खेती गरिएका माछाका प्रजातिहरू र सिक्किमका मूल्यवर्धित माछा उत्पादनहरूलाई प्रवर्द्धन गर्ने लक्ष्य राखेको छ। यो महोत्सवले स्थानीय माछा किसानहरूलाई छिमेकी क्षेत्रका उपभोक्ताहरू, उद्यमीहरू र व्यापारीहरूसँग जोड्ने एक अद्वितीय मञ्चको रूपमा काम गर्नेछ, साथै दिगो माछा पालन र माछाको पोषण महत्त्वको बारेमा जागरूकता पनि जगाउनेछ।

सिक्किमका माछा उत्पादनहरू र किसानहरूको लागि व्यापक पहुँच र दृश्यता सुनिश्चित गर्न दुई दिने कार्यक्रम सिलगढ़ीको व्यस्त व्यावसायिक केन्द्रमा आयोजना गरिनेछ। महोत्सवमा प्रगतिशील माछा पालकहरू, स्व-सहायता समूहहरू र सिक्किमका सबै जिल्लाका उद्यमीहरूद्वारा स्थापित प्रदर्शनी एवं बिक्री स्टलहरू राखिने छन्।

आगन्तुकहरूले ताजा रेन्बो ट्राउट, स्मोक्ड र सुकेको माछा उत्पादनहरू, माछाको अचार, र राज्यका प्रशोधित उत्पादहरू अनुभव गर्ने र खरिद गर्ने अवसर पाउनेछन्। यसका साथै आगन्तुकहरूले सिक्किमको ट्राउट माछाको स्वाद पनि चाख्न पाउने छन्।

हिन्दुस्थान समाचार / बिशाल