नाम्चीमा एक सप्ताहसम्म चल्ने शिविरबाट 550 दिव्याङ्गजन र ज्येष्ठ नागरिक लाभान्वित हुनेछन्

नाम्ची, 15 नोभेम्बर (हि.स.)। राष्ट्रिय गतिमान दिव्याङ्गजन संस्थान (अपाङ्गता), एनआईएलडी, कोलकाताको प्रशासनिक नियन्त्रणमा रहेको दिव्याङ्गजनको कौशल विकास, पुनर्वास र सशक्तिकरणका लागि समग्र क्षेत्रीय केन्द्र, सीआरसी सिक्किमले प्रधानमन्त्री दिव्य सक्षम केन्द्र (पीएमडीके), गान्तोकको सहयोगमा 14 नोभेम्बर, 2025 मा सिक्किम सरकारी कलेज, नाम्ची (कामराङ) मा एक हप्ता लामो मूल्याङ्कन तथा वितरण शिविरको उद्घाटन गऱ्यो।

सिक्किम राज्य सहकारी सङ्घ (सिकोन) र नाम्ची जिल्लाको सहकारिता विभागको सहयोगमा आयोजित यस शिविरको उद्देश्य नाम्ची जिल्लाका दिव्याङ्गजन र ज्येष्ठ नागरिकहरूका लागि 58 लाख रुपियाँ मूल्यको आवश्यकता आधारित सहायक उपकरणहरूको वितरणको माध्यमद्वारा 550 व्यक्तिहरूलाई लाभान्वित गर्नु हो। यी मध्ये लगभग 50 लाभार्थीहरूलाई उद्घाटनको अवसरमा उपस्थित विशिष्ट व्यक्तिहरूद्वारा सहायक उपकरण प्रदान गरियो। उक्त जानकारी आज पीआईबीले दिएको छ।

यो पहल सीआरसी सिक्किमद्वारा भारत सरकारको सामाजिक न्याय तथा सशक्तिकरण मन्त्रालयको दिव्याङ्गजन सशक्तिकरण विभाग (अपाङ्गता) को पहुँच बाहिर पुग्न र प्रमुख कार्यक्रमहरूको कार्यान्वयन गर्न निरन्तर प्रयासको एक हिस्सा हो। यो कार्यक्रमका साथै सिकोनको 72औँ अखिल भारतीय सहकारी सप्ताह (14-20 नोभेम्बर 2025) को शुभारम्भ पनि गरियो, जुन राष्ट्रिय गीत वन्दे मातरमको 150 वर्ष पूरा भएको विशेष प्रथम चरणको उत्सवसँग मेल खान्छ।

कार्यक्रममा मुख्य अतिथि सिक्किम विधानसभाकी उपाध्यक्ष राजकुमारी थापा, सिकोनका अध्यक्ष डा. मङ्गलजित राई, सिक्किम सरकारी कलेज, नाम्चीका उपाचार्य डा. सञ्जय सुब्बा, सिकोनका मुख्य कार्यकारी अधिकारी फादुङ भोटिया, ज्येष्ठ नागरिक, विद्यार्थी, सङ्काय सदस्य र अन्य विशिष्ट व्यक्तिहरू सामेल थिए।

आफ्नो सम्बोधनमा मुख्य अतिथि थापाले सहकारिता आन्दोलनलाई युवा पुस्तासम्म पुऱ्याउने महत्त्वमाथि जोड़ दिँदै डिजिटल रूपमा सशक्त युवाहरूले सहकारी क्षेत्रलाई उल्लेखनीय रूपमा बलियो र आधुनिकीकरण गर्न सक्छन् भन्ने कुरा उल्लेख गरिन्। उनले मुख्यमन्त्री पीएस तामाङको दूरदर्शी नेतृत्वलाई प्रकाश पारिन्, जसको प्रोत्साहन, पुरस्कार, अनुदान र वित्तीय सहायताको माध्यमद्वारा निरन्तर समर्थनले यस क्षेत्रमा उल्लेखनीय प्रगतिलाई उत्प्रेरित गरेको छ। उनले नाम्ची जिल्लाका दिव्याङ्गजन र ज्येष्ठ नागरिकहरूलाई आवश्यक सहायक उपकरण प्रदान गरेकोमा सीआरसी सिक्किम र कल्याण विभागप्रति पनि आभार व्यक्त गरिन्।

सिकोनका अध्यक्ष डा. मङ्गलजित राईले अन्तरराष्ट्रिय सहकारिता वर्ष (आईवाईसी) सँग मिल्दोजुल्दो गरी 14-20 नोभेम्बर 2025 सम्म सिक्किमका सबै जिल्लाहरूमा 72औँ सहकारी सप्ताह मनाइने घोषणा गरे।

सीआरसी सिक्किमकी निर्देशक पुष्पाञ्जली गुप्ताले केन्द्रको पुनर्वास सेवा, कौशल विकास पहल र सिक्किममा दिव्याङ्गजनलाई समर्थन गर्न चलिरहेका प्रयासहरूको बारेमा एक विस्तृत प्रस्तुति दिइन्। उनले राज्यभरिमा समावेशी विकास र सुगम्यताको लागि अन्तर-विभागीय सहकार्यको महत्त्वमाथि जोड़ दिइन्। वितरण भइरहेका सहायक उपकरण ज्येष्ठ नागरिकहरूका लागि राष्ट्रिय वयोश्री योजना र भारत सरकारको दिव्याङ्गजन सशक्तिकरण विभाग (डीईपीडब्ल्यूडी), एमएसजेईको एडीआईपी योजना अन्तर्गत छन्, जसलाई कृत्रिम अङ्ग निर्माण निगम (एलिम्को), कानपुरबाट प्राप्त गरिएका हुन्। उनले सिक्किमका अन्य जिल्लाहरूमा पनि यस्तै वितरण जारी रहेको बताइन्।

गुप्ताले नाम्चीमा शिविरको अनुमति दिएकोमा एनआईएलडी कोलकाताका निर्देशक डा. ललित नारायण, कार्यक्रमको शोभा बढ़ाएकोमा मुख्य अतिथि राजकुमारी थापा र उद्घाटन कार्यक्रम आयोजना गर्न सहयोगका लागि डा. मङ्गलजित राईप्रति पनि हार्दिक आभार व्यक्त गरिन्।

यो शिविरले दिव्याङ्गजन र ज्येष्ठ नागरिकहरूलाई सशक्त बनाउनका लागि सीआरसी सिक्किमको प्रतिबद्धतालाई रेखाङ्कित गर्दछ तथा एक समावेशी र सुलक्ष समाजप्रति राष्ट्रको प्रतिबद्धतालाई सुदृढ़ बनाउँछ।

हिन्दुस्थान समाचार / बिशाल