गान्तोक, 1 दिसम्बर (हि.स.)। सिक्किमको कञ्चनजोङ्गा राष्ट्रिय निकुञ्जमा अवस्थित गोचेला-जोङ्ग्री पदमार्गलाई आउटलुक ट्राभलर अवार्ड २०२५ मा 'भारतको सर्वश्रेष्ठ पदयात्रा सर्किट' को लागि स्वर्ण पुरस्कार प्रदान गरिएको छ। पश्चिम सिक्किमको योक्समबाट शुरु हुने गोचेला-जोङ्ग्री पदमार्ग युनेस्कोको विश्व सम्पदा स्थल कञ्चनजोङ्गा राष्ट्रिय निकुञ्जमा रहेको ४५ किलोमिटर लामो सात दिनको उच्च उचाइको पदमार्ग हो।

यसैगरी, अन्तरराष्ट्रिय प्रकृति संरक्षण संघ (आईयूसीएन) ले सिक्किमको कञ्चनजोङ्गा राष्ट्रिय निकुञ्जलाई विश्वको सर्वश्रेष्ठ व्यवस्थित संरक्षित क्षेत्रहरू मध्ये एक घोषित गर्दै विशेष मान्यता प्रदान गरेको छ। यो सम्मानले गोचेला-जोङ्ग्री मार्गलाई देशको अग्रणी ट्रेकिङ सर्किटको रूपमा पुष्टि गर्दै यसलाई भारतको अग्रणी ट्रेकिङहरूमा प्रमुख रूपमा स्थान दिएको वन तथा पर्यावरण विभागले प्रेस विज्ञप्तिमा जनाएको छ।

विभागले भनेको छ, यो पुरस्कारले सिक्किमको व्यापक पारिस्थितिक पर्यटन रणनीतिलाई अझ बलियो बनाउँछ। गोचेला-जोङ्ग्री मार्गले बाक्लो जङ्गलहरू, घाँसका मैदानहरू समेट्दै केही सबैभन्दा प्राचीन हिमालयी पारिस्थितिक प्रणालीहरू पार गर्दछ, जसले हिउँले ढाकिएको कञ्चनजोङ्गा श्रृंखलाको मनमोहक दृश्यहरू प्रदान गर्दछ। हिमालयका प्रमुख ट्रेकहरू मध्ये एकको रूपमा मान्यताप्राप्त यो सर्किट साहसिक कार्य, उचाइ र असाधारण प्राकृतिक दृश्यहरूको मिश्रणको लागि सम्मानित गरिएको विभागले जनाएको छ।

हिन्दुस्थान समाचार / बिशाल