गान्तोक, 10 जून (हि.स.)। सिक्किमका लोकसभा सांसद डा. इन्द्रहाङ सुब्बाले आज नयाँ दिल्लीमा आयोजित उपभोक्ता मामिला, खाद्य र सार्वजनिक वितरण सम्बन्धी स्थायी समितिको महत्त्वपूर्ण बैठकमा भाग लिए। बैठकको अध्यक्षता सांसद तथा समितिकी अध्यक्ष कनिमोझी करुणानिधिले गरेकी थिइन्।
बैठकमा खाद्य अन्नको खरिद र वितरण, उपभोक्ता राज्यहरूलाई आपूर्ति तथा खाद्यान्न संरक्षणको लागि भण्डारण र आधुनिक प्रविधि जस्ता विषयहरूमाथि चर्चा भएको सांसद कार्यालयद्वारा जारी प्रेस विज्ञप्तिमा उल्लेख छ।
सांसद सुब्बाले बैठकमा सिक्किमसँग सम्बन्धित राज्य-विशिष्ट मुद्दाहरूलाई उजागर गर्दै विशेष गरी सार्वजनिक वितरण प्रणाली (पीडीएस) अन्तर्गत लाभार्थीहरूलाई गुणस्तरीय खाद्यान्नको भण्डारण, ढुवानी र आपूर्तिमाथि कुरा राखे। उनले सिक्किममा बाढी जस्ता प्राकृतिक प्रकोपहरूको बढ्दो घटनालाई उद्धृत गर्दै यस क्षेत्रमा बफर भण्डारण पूर्वाधारको आवश्यकतामा जोड दिए। उनले सम्बन्धित विभागहरूलाई हिमालय भूभागको लागि उपयुक्त आधुनिक र जलवायु-अनुकूल भण्डारण प्रविधिहरूको अन्वेषण गर्न आग्रह गरे।
यसका साथै, उनले देशका चुनौतीपूर्ण भौगोलिक क्षेत्रहरूमा खाद्यान्नको निर्बाध वितरण सुनिश्चित गर्न आपूर्ति शृङ्खलाहरूलाई सुदृढ पार्न आह्वान गरे। उनले सिक्किम जस्ता राज्यहरूमा जहाँ प्रतिकूल मौसमको अवस्थामा पहुँच प्रायः कठिन हुने गर्दछ भन्दै आवश्यक खाद्य वस्तुहरूको गुणस्तर र समयमै वितरण राष्ट्रिय प्राथमिकता हुनुपर्छ भनी बताए।
सांसद सुब्बाले समितिको प्रयासको सराहना गर्दै सिक्किम र देशभरि खाद्य सुरक्षा र उपभोक्ता कल्याण सुनिश्चित गर्न सबै सरोकारवालाहरूसँग सहकार्य गर्ने आफ्नो प्रतिबद्धतालाई पुन: पुष्टि गरे।
हिन्दुस्थान समाचार / बिशाल
12 Jun 2025