- योग्य लाभार्थीहरूको पहिचान गर्न समर्पित टीम गठन गर्न मुख्यमन्त्रीको आह्वान
गान्तोक, 30 जुलाई (हि.स.)। आगामी 'आमा सम्मान दिवस' को तयारीलाई लिएर आज राजधानीस्थित सम्मान भवनमा मुख्यमन्त्री प्रेमसिंह तामाङको अध्यक्षतामा एक समन्वय बैठक सम्पन्न भयो। आमा सम्मान दिवस आगामी 10 अगस्तका दिन रम्फूमा मनाइने छ। उक्त कार्यक्रम सिक्किमभरिका आमाहरूको निःशर्त प्रेम, त्याग र जीवनभरको योगदानलाई मनाउन र सम्मान गर्ने उद्देश्यले आयोजना गरिने बताइएको छ।
कार्यक्रम अन्तर्गत राज्य सरकारले तय गरेको मानदण्ड पूरा गर्ने योग्य आमाहरूलाई सम्मानित गरिने छ र आमा सशक्तिकरण योजना अन्तर्गत चेक प्रदान गरिने छ। आमा सशक्तिकरण योजना राज्यका महिलाहरूको सशक्तिकरण र उत्थान गर्न बनाइएको सरकारी पहल रहेको सीएमओले आज विज्ञप्तिमा बताएको छ।
बैठकमा मुख्यमन्त्रीले समाजलाई आकार दिने कार्यमा आमाहरूको महत्वपूर्ण भूमिकामाथि प्रकाश पारे। उनले आमाहरूलाई हेरचाहकर्ता, शिक्षक र मार्गदर्शकको रूपमा वर्णन गरे, जसले आफ्ना बच्चाहरूमा करुणा, सहानुभूति र जिम्मेवारी जस्ता आवश्यक मूल्यहरू स्थापित गर्छन्, जुन मूल्यहरूले बलियो र नैतिक रूपमा सचेत समाजको जगको रूपमा काम गर्छन् भनी बताएका छन्।
उनले आफ्नो सम्बोधनमा मन्त्रीगण, विधायकगण, सल्लाहकारगण, राजनीतिक सचिवहरू, ओएसडीहरू, सीएलसी अध्यक्षहरू, महिला, बाल बालिका, वरिष्ठ नागरिक एवं दिव्याङ्गजन कल्याण विभागका सचिव र अधिकारीहरूलाई स्पष्ट निर्देशन दिएका छन्। मुख्यमन्त्रीले पूर्ण निष्पक्षता र पारदर्शिताका साथ वास्तविक र योग्य लाभार्थीहरूको पहिचान गर्न प्रत्येक निर्वाचन क्षेत्रमा समर्पित टीम गठन गर्न आह्वान गरे।
मुख्यमन्त्रीले इमानदारी र निष्ठाले परिपूर्ण सामूहिक प्रयासको लागि आह्वान गर्दै भने, 'कुनै पनि योग्य आमालाई छुट्याउनु हुँदैन र छनोट प्रक्रियामा कुनै पनि अन्याय हुनु हुँदैन।' उनले यो पहल एउटा सरकारी योजनाभन्दा धेरै रहेको उल्लेख गर्दै यसलाई मातृत्वको स्थायी शक्ति र भावनाप्रति हार्दिक सम्मान रहेको बताए।
हिन्दुस्थान समाचार / बिशाल
31 Jul 2025
