मङ्गन, 15 अगस्त (हि.स.)। देशको 79औं स्वतन्त्रता दिवसको अवसरमा मन्त्री साम्डुप लेप्चाले आज बिहान रिचु नालामा टीडीआर एक्स्ट्रा वाइड बेली ब्रिजको उद्घाटन गरे। यस बेली ब्रिजले मङ्गन-चुङथाङ लिंक पुनर्स्थापित गर्दै कनेक्टिभिटी बढाएको छ।
यस मार्गको रणनीतिक महत्त्व र धेरै अनुरोधहरूलाई ध्यानमा राख्दै यो पुल खुल्ला गरिएको बताइएको छ। यद्यपि, यहॉं रिटेनिङ वाल, कल्भर्ट ड्रेनेज सिस्टम र सतहीकरण जस्ता स्थायी पूर्वाधार कार्यहरू चलिरहेकाले हाल हलुका सवारी साधनहरूको लागि मात्र खुला गरिएको स्पष्ट गरिएको छ।
यो पुलले मङ्गन र चुङथाङसम्मको मुख्य मार्गलाई जोड्छ, जसले अगाडिका क्षेत्रहरूमा सजिलो र छिटो पहुँच प्रदान गर्दछ। 79औं स्वतन्त्रता दिवस समारोहको अवसरमा उद्घाटन गरिएको यो पुल मन्त्री लेप्चा, बीआरओ/ग्रेफ र राज्य सरकारको राष्ट्र निर्माणको भावनामा राज्यको प्रगति र जनताको कल्याणको लागि एकताबद्ध रूपमा काम गर्ने अटल प्रतिबद्धताको प्रमाण रहेको बताइएको छ।
यस अवसरमा सिक्किम कल्याण आयोगका अध्यक्ष निम छिरिङ लेप्चा, वन तथा पर्यावरण विभागका अध्यक्ष पेमा वोङ्गे लाचुङपा, राज्य औषधीय वनस्पति बोर्डका अध्यक्ष सोनाम ग्यात्सो लाचेन्पा, एसडीएम मङ्गन रिन्चेन दोर्जी भोटिया, ओएसडी छिरिङ वाङ्ग्याल भोटिया, पञ्चायतगण, लाइन विभागका अधिकारीहरू र स्थानीय बासिन्दाहरू पनि उपस्थित थिए।
हिन्दुस्थान समाचार / बिशाल
