गान्तोक, 16 अगस्त (हि.स.)। देशको 79औं स्वतन्त्रता दिवसको अवसरमा राजधानीको पाल्जोर स्टेडियममा शुक्रवार राज्यस्तरीय कार्यक्रम आयोजन गरियो। कार्यक्रमलाई सम्बोधन गर्दै मुख्यमन्त्री प्रेमसिंह तामाङले विगत पचास सालमा स्वास्थ्य, शिक्षा, सामाजिक कल्याण र पूर्वाधारको क्षेत्रमा भएको उल्लेखनीय प्रगतिमाथि प्रकाश पारे। उनले सिक्किम आज प्रतिव्यक्ति आयमा दोस्रो स्थान र मानव विकास सूचकांकमा छैटौं स्थानमा रहेको जानकारी गराए। उनले दिगो विकास लक्ष्यमा देशकै उत्कृष्ट प्रदर्शन गर्ने राज्यहरू मध्ये एक रहेको पनि जानकारी गराए।
मुख्यमन्त्रीले 'सुनौलो सिक्किम, समृद्ध सिक्किम, अनि समर्थ सिक्किम' को दृष्टिकोणप्रति प्रतिबद्धता दोहोर्याए। उनले राज्य सरकारले आर्थिक र सामाजिक विकासलाई प्रवर्द्धन गर्ने, सामुदायिक बन्धनलाई सुदृढ पार्ने, सांस्कृतिक सम्पदाको रक्षा गर्ने र राज्यको अद्वितीय पारिस्थितिक जैविक विविधताको संरक्षण गर्ने अग्रगामी नीतिहरू मार्फत दिगो विकास र प्रगतिमा ध्यान केन्द्रित गरिरहेको बताए। मुख्यमन्त्रीले यो दृष्टिकोण प्रधानमन्त्रीको विकसित भारत निर्माण गर्ने मिशनसँग निकट रूपमा मिल्दोजुल्दो रहेको पनि बताए। उनले बलियो र समृद्ध राज्यहरू मार्फत नै विकसित भारतको सपना साकार पार्न सकिन्छ भनी बताए।
मुख्यमन्त्रीले 2019 मा सरकार गठन गरेपछि स्वास्थ्य क्षेत्रलाई उच्च प्राथमिकता दिएर काम गरिरहेको बताउॅंदै वर्तमान सरकारले स्वास्थ्यको क्षेत्रमा गरेका कार्यहरूमाथि प्रकाश पारे। उनले राज्यको चिकित्सा कार्यबललाई सुदृढ पार्न वार्षिक रूपमा 100 जना विद्यार्थीहरूको प्रवेशका साथ राज्य मेडिकल कलेज 2026 मा सञ्चालनमा आउने जानकारी गराए।
शिक्षा क्षेत्र पनि सरकारको उच्च प्राथमिकतामा रहेको उल्लेख गर्दै मुख्यमन्त्रीले विगत 6 वर्षमा 14 वटा विश्वविद्यालय स्थापना गरिएको र थप 12 वटा विश्वविद्यालय प्रक्रियामा रहेको जानकारी गराए। उनले नेताजी सुभाषचन्द्र बोस उत्कृष्टता विश्वविद्यालय, राष्ट्रिय कानुन विश्वविद्यालय, राज्य फार्मेसी कलेज र राभाङलामा एनआईटी उल्लेखनीय संस्थानहरू रहेको अवगत गराए। उनले नयाँ भारत साक्षरता कार्यक्रमले 2027 सम्ममा पूर्ण साक्षरता हासिल गर्ने लक्ष्य राखेको बताए, जसमा आधारभूत, डिजिटल, वित्तीय साक्षरता र निरन्तर शिक्षा समावेश रहने बताए।
मुख्यमन्त्रीले सिक्किम विद्युत क्षेत्र विकास परियोजनाको उद्देश्य सबै घरपरिवार, उद्योग र व्यावसायिक प्रतिष्ठानहरूलाई 24x7 गुणस्तरीय र भरपर्दो बिजुली प्रदान रहेको बताए, जसको कुल परियोजना लागत ₹1,607.78 करोड र यो एसियाली विकास ब्याङ्कद्वारा समर्थित रहेको छ। उनले दिगो ऊर्जा संक्रमणलाई सक्षम बनाउन जलवायु-लचिलो, नवीकरणीय-तयार बिजुली प्रणाली निर्माणमा प्रमुख ध्यान केन्द्रित गरिने पनि जानकारी गराए। उनले आर्थिक वृद्धि, रोजगारी सिर्जना र गरिबी निवारणमा पर्यटन क्षेत्रको सम्भावनालाई स्वीकार गर्दै सरकारले यसलाई उच्च विकास प्राथमिकतामा राखेको पनि बताए।
मुख्यमन्त्रीले आफ्नो सम्बोधनमा भारतीय चिकित्सा अनुसन्धान परिषद् (आईसीएमआर) ले 'कम कुल प्रजनन दरलाई सम्बोधन गर्न सिक्किममा राज्य स्वास्थ्य प्रणालीको प्रजनन प्रवृत्ति, निर्धारक र तयारीको द्रुत मूल्याङ्कन' शीर्षकको नयाँ आन्तरिक अनुसन्धान परियोजनालाई स्वीकृत गरेको जानकारी गराए। यसका उद्देश्यहरूमा प्रजनन प्रवृत्तिहरूको विश्लेषण गर्ने, प्रमुख निर्धारकहरू पहिचान गर्ने, र घट्दो कुल प्रजनन दरको चुनौतीहरूलाई सम्बोधन गर्न राज्यको स्वास्थ्य प्रणालीको तयारीको मूल्याङ्कन गर्ने समावेश रहेको उनले बताए। यी निष्कर्षहरूले सिक्किमको जनसांख्यिकीय स्थिरतालाई जोगाउन प्रजनन स्वास्थ्य सेवाहरूको सुदृढीकरण र प्रमाण-आधारित नीतिहरूको विकासलाई मार्गदर्शन गर्ने उनले अवगत गराए।
मुख्यमन्त्रीले सिक्किमलाई रूपान्तरण गर्ने संस्थान (आईटीएस) को स्थापनाको पनि घोषणा गरे, जुन राज्यको लागि डाटा, प्रमाण, नवीनता र जवाफदेहिताको सिद्धान्तमा निर्मित नयाँ नीतिगत केन्द्र हुने बताए।
हिन्दुस्थान समाचार / बिशाल
