गान्तोक, 17 अगस्त (हि.स.)। आदि कर्मयोगी अभियानको लोगि सात दिवसीय क्षेत्रीय प्रक्रिया प्रयोगशाला कार्यशाला गुवाहाटीमा 11 देखि 17 अगस्तसम्म आयोजन गरियो। कार्यक्रममा सिक्किम लगायत असम, मिजोरम र नागाल्याण्ड राज्यको सामाजिक कल्याण विभाग, ग्रामीण विकास विभाग, शिक्षा विभाग र वन विभागका अधिकारीहरू सहभागी बनेका थिए। कार्यक्रमको उद्घाटन असम सरकारको जनजाति मामिला मन्त्री डा. रानोज पेगुले गरेका थिए।
क्षेत्रीय प्रक्रिया प्रयोगशाला सहभागी अधिकारीहरूका लागि सहयोगात्मक र गहन शिक्षण अनुभवलाई सहज बनाउन डिजाइन गरिएको थियो। कार्यक्रमको उद्देश्य अधिकारीहरूलाई आ-आफ्नो क्षेत्रमा सकारात्मक परिवर्तन ल्याउन र आ-आफ्नो राज्यमा आदिवासी जनजातिको समग्र विकासमा योगदान पुर्याउन आवश्यक सीप र ज्ञानले सुसज्जित गर्नु थियो।
प्रयोगशालामा विभिन्न अन्तरक्रियात्मक सत्रहरू, कार्यशालाहरू, समूह छलफलहरू, समूह गतिविधिहरू र प्रस्तुतीकरणहरू समावेश थिए। सहभागीहरूले आ-आफ्नो राज्यका अनुभवहरू र उत्कृष्ट अभ्यासहरू पनि साझा गरे।
आदि कर्मयोगी अभियान भारत सरकारको आदिवासी मामिला मन्त्रालयको एक ध्वजवाहक कार्यक्रम हो जसको उद्देश्य देशका एक लाखभन्दा धेरै आदिवासी गाउँहरूमा शासन र विकास प्रदान गर्न 20 लाख प्रशिक्षित तृणमूल स्तरका परिवर्तनकारी नेताहरूको क्याडर निर्माण गर्नु हो। क्षेत्रीय प्रक्रिया प्रयोगशाला कार्यक्रमका सहभागी अधिकारीहरूले आ-आफ्नो राज्यमा सकारात्मक परिवर्तन ल्याउन स्टेट मास्टर ट्रेनर्सको रूपमा महत्वपूर्ण भूमिका खेल्ने अपेक्षा गरिएको सामाजिक कल्याण विभागले विज्ञप्तिमा जनाएको छ।
हिन्दुस्थान समाचार / बिशाल
