खरसाङ, 30 अगस्त (हि.स.)। गोपाल योञ्जन सङ्गीत सम्मान यसपाली सङ्गीतकार बरुण रसाइली र गीतकार सुकुमार बराईलीलाई प्रदान गरिएको छ।‌ गौरव मञ्च तीनधारेको आयोजनामा 2023 देखि शुरु गरिएको वाङ्ग्येकार गोपाल योञ्जन सङ्गीत सम्मान यसपाली तीनधारे क्षेत्रका सङ्गीतकार एवं सङ्गीतका गुरुजी साथै गायक बरुण रसाइली र तीनधारे चियाबारी निवासी गीतकार सुकुमार बराईलीलाई प्रदान गरिएको छ।

उक्त पुरस्कार गौरव मञ्च तीनधारेको आयोजनामा शनिवार तीनधारेको महात्मा गाँधी हलमा आयोजित 82औं गोपाल योञ्जन जन्म जयन्ती समारोहमा प्रदान गरिएको छ। दुवैलाई सभाध्यक्ष बिजय गुरुङ र प्रमुख अतिथि वरिष्ठ सङ्गीतकार बसन्त छेत्रीको बाहुलीबाट खदार्पणसहित शल ओढाएर जातीय टोपी पहिराएर अनि सम्मान पत्र प्रदान गरेर सम्मान जनाइयो।

यसरी नै दुवैलाई प्रायोजकहरु क्रमैले सागरमणि वाईबा र ज्योति मुखियाले दिवगंत छोरा लवाङमणि बाईबाको स्मृतिमा अनि पञ्चायत सदस्य अजय विश्वकर्म र उनकी पत्नीले आफ्ना दिवंगत माता पिता स्व संगीता विश्वकर्म र स्व रामबहादुर विश्वकर्मको स्मृतिमा प्रायोजित काष्ठ कलामा रहेको सारङ्गी प्रदान गरेर सम्मान जनाइयो। सङ्गीतकार बरुण रसाइली र गीतकार सुकुमार बराईलीको परिचय र सम्मान पत्र सञ्चालनकर्ता युवराज सुन्दासले पठन गरेका थिए।

गोपाल योञ्जन सङ्गीत सम्मानपछि सम्मानित सङ्गीतकार बरुण रसाइली र गीतकार सुकुमार बराईलीसित युवराज सुन्दासले छोटो विमर्श पनि गरेका थिए।‌ सङ्गीतकार, गायक एवं सङ्गीतका गुरुजी बरुण रसाइलीले अहिलेसम्म धेरै साङ्गीतिक कोशेलीहरु दिइसकेका छन्। उनको गजलको एल्बम 'निखार' प्रकाशित छन् भने भजन संगालो 'भजन पुष्प चरणमा' अनि 'साई गंगा अनि सामुहिक' पनि प्रकाशित छन्। उनले विभिन्न गीतहरु र एल्बमहरुमा आफ्नो स्वर र सङ्गीत दिइसकेका छन्।

उनी आकाशवाणी खरसाङको मान्यताप्राप्त गायक पनि हुन्‌। बरुण रसाइलीले सुर गुञ्जन सङ्गीत महाविद्यालय तीनधारे र सुकनामा सञ्चालन गरिरहेका छन्। उनले 70 को दशकदेखि नै नेपाली सङ्गीतमा विशिष्ट योगदान दिॅंदै आएका छन्।

यसैगरी, तीनधारेका‌ वरिष्ठ गीतकार सुकुमार बराईलीको गीत संग्रह 'आमा रोएकी चियाबारीमा' प्रकाशित छन् भने धेरै गीतहरू लेखेका छन्। उनी अहिलेका युवा पुस्ताका लागि प्रेरक साथै प्रेरणाका स्रोत हुन्।

गौरव मञ्च तीनधारेले 2023 देखि स्थानीय सङ्गीतकार र कलाकारहरुलाई सम्मान जनाउने क्रम शुरु गरेको हो। यस अन्तर्गत पहिलोपटक 2023 मा सङ्गीतकार सुरेन बम्जनलाई यो सम्मान प्रदान गरिएको थियो‌। त्यसपछि गत वर्ष 2024 मा वरिष्ठ गायक सङ्गीतकारहरु क्रमैले गोपाल गजमेर, गौतम मोक्तान र चन्दु भुसाललाई प्रदान गरियो। यसपाली यो सम्मान तीनधारेकै सङ्गीतकार बरुण रसाइली र गीतकार सुकुमार बराईलीलाई प्रदान गरिएको छ।

हिन्दुस्थान समाचार / हनोक