खरसाङ, 30 अगस्त (हि.स.)। खरसाङको नयाँ बजारस्थित सामुदायिक हलमा खरसाङका जनसाधारणलाई स्वास्थ्य लाभ होस् भनी गत 22 अगस्तदेखि आयोजना गरिएको नि:शुल्क रुद्राक्ष थेरापी शिविर शनिवार समापन भएको छ। शिविरको आयोजना गोर्खाल्याण्ड क्षेत्रीय प्रसाशनका मुख्य कार्यपाल अनित थापाको पहलमा अनि खरसाङ रोगी कल्याण समितिका अध्यक्ष दिवस छेत्री लगायत भारतीय गोर्खा प्रजातान्त्रिक मोर्चा टाउन कमिटीको सहयोगमा र चेन्नईबाट आएका योग गुरू रबिको सञ्चालनमा गरिएको थियो।
रुद्राक्ष थेरापीद्वारा गरिने थेरापीमा शरीरमा भएकाे कमजोर नशाबाट रक्त प्रवाह सुचारु हुनका साथै अंगहरू मजबुत बनाउनमा सहायक हुन्छ। रोगहरुसँग लड्ने क्षमता बढ्छ। यो नौ दिन भएको शिविरमा खरसाङका लगभग दुई हजारभन्दा अधिक मानिसहरुले यस थेरापीको लाभ उठाएको जानकारी प्राप्त भएको छ। धेरै मानिसहरुलाई यो थेरापी लिए पश्चात उनीहरुको प्रायः शारीरिक समस्याहरूमा सुधार भएकाे जनमानस अनुभव साझा गरेका छन्।
यस नौ दिने निःशुल्क रुद्राक्ष थेरापी शिविरमा सहयोग गर्ने सात कन्या एवम् कात्यनी धामका सदस्यगण, खरसाङ नगरपालिकाका शिशु शिक्षा केन्द्र शिक्षक सहायिका, वार्ड नम्बर सत्र, नयाँ बजार भागोप्रमो नारी शक्तिका सदस्या, युवा शक्ति सदयागण लगायत टाउन कमिटी उपलब्ध गराएकोमा खरसाङ महकुमा समिति युवा शक्तिका अध्यक्ष प्रेमेन्द्र गुरुङ अनि टाउन कमिटीका कार्यवाहक सचिव बीरबल पाख्रीनले सबैलाई धन्यबाद दिएका छन्।
हिन्दुस्थान समाचार / हनोक
31 Aug 2025