खरसाङ, 30 अगस्त (हि.स.)। हिल तराई डुवर्स प्लान्टेशन वर्कर्स युनियन मालुटार चियाबारी युनिटको आयोजनामा मालुटार चियाबारीमा गेट मिटिङ आयोजना गरेर बीस प्रतिशत बोनसको लागि पहल गरिदिएकोमा जीटीए प्रमुख अनित थापालाई धन्यवाद दिइएको छ। उक्त गेट मिटिङ शिवखोला ग्राम पञ्चायतको मालुटार क्षेत्रका पञ्चायत सदस्या सिर्जना छेत्रीको अध्यक्षतामा सम्पन्न भयो।
गेट मिटिङमा चियाबारी श्रमिकहरुलाई मालुटार चियाबारी युनिटका सभापति प्रह्लाद छेत्रीले सम्बोधन गर्दै यसपाली चियाबारी श्रमिकहरुको पूजा बोनस बीस प्रतिशत गराउन पहल गरिदिएकोमा जीटीए प्रमुख अनित थापालाई धन्यवाद दिए। उनले बीस प्रतिशत बोनसको लागि राज्य सरकारको श्रम मन्त्रालयले एडभाइजरी जारी गरेकोमा खुशी व्यक्त गरे। उनले यो बीस प्रतिशतको बोनस चियाबारी श्रमिकहरुलाई पूजा अघि नै वितरण गरिनु पर्ने माग पनि राखेका छन्।
यस गेट मिटिङमा हिल तराई डुवर्स प्लान्टेशन वर्कर्स युनियन मालुटार चियाबारी युनिट कमिटीका उपाध्यक्ष पूर्ण लामा पनि उपस्थित रहेका थिए। यसैगरी, भारतीय गोर्खा प्रजातान्त्रिक मोर्चाका पदाधिकारीहरु, युवा शक्ति र नारी शक्तिका प्रतिनिधिहरु पनि उपस्थित थिए भनी युनियनको तीनधारे महानदी समष्टिका संयोजक राजेस थापाले जानकारी दिएका छन्।
हिन्दुस्थान समाचार / हनोक
31 Aug 2025