खरसाङ, 30 अगस्त (हि.स.)। गौरव मञ्च तीनधारेको आयोजनामा गोपाल योञ्जनको‌ 82औं जन्म जयन्ती आज तीनधारेको महात्मा गाँधी हलमा सम्पन्न भयो। उक्त कार्यक्रमको अध्यक्षता बिजय गुरुङले‌ गरेका थिए भने प्रमुख अतिथिको रुपमा वरिष्ठ सङ्गीतकार बसन्त छेत्री उपस्थित रहेका थिए।

कार्यक्रममा विशिष्ट अतिथिको रुपमा जीटीएका सूचना अनि सांस्कृतिक विभागको कार्यकारी सभासद अनोश थापा, तीनधारे महानदी समष्टिको सभासद नवराज छेत्री, डा मोहन पी दाहाल, गायिका रिमला मोक्तान, साहित्य कला संस्थान् तीनधारेको सभापति रञ्जनकुमार रसाइली, तीनधारे चियाबारीका प्रबन्धक नितिस विश्वास, गोपाल योञ्जनकी‌ भाञ्जीहरु क्रमैले चित्रकला गुरुङ र बिजया गुरुङ आदि उपस्थित थिए।

वाग्येयकार गोपाल योञ्जनको तस्वीरमा अतिथिहरुका बाहुलीबाट खदार्पणसहित धुप दीप प्रज्ज्वलन गरेर कार्यक्रम थालियो। शिक्षक एवं साहित्यकार युवराज सुन्दासले सञ्चालन गरेको कार्यक्रममा गौरव मञ्चको आयोजनामा भइरेहको गोपाल योञ्जन जयन्ती र सम्मान कार्यक्रमको उद्देश्य विषयमा गायक महेश सेवाले वक्तव्य राखेका थिए। कार्यक्रममा स्वागत सम्भाषण गौरव मञ्च तीनधारेको संयोजक सुप्रेम छेत्रीले राखेका थिए।

गोपाल योञ्जनको 82औं जन्म जयन्तीको अवसरमा कलाकारहरुले गोपाल योञ्जनका‌ गीतहरु प्रस्तुत गरेर माहोल नै सङ्गीतमय र गोपालमय बनाएका थिए। कार्यक्रममा गोपाल योञ्जनका विभिन्न कालजायी गीतहरु क्रमैले गायक राकेश लामा, सतीश राई, अन्तोष तामाङ, सुयेश शंकर, दिपेश पाख्रीन, सन्तोष लामा, चन्द्रिका विश्वकर्म, सुमन निरौला र आनन्द विश्वकर्मले प्रस्तुत गरेका थिए। कार्यक्रममा वाग्येयकार गोपाल योञ्जन विषयमा सङ्गीतकार रुपेश रसाइलीले वक्तव्य राखेका थिए।

उनले आफ्नो सम्बोधनमा गोपाल योञ्जन संगीतको महासागर हुन् भन्दै उनी नेपाली सङ्गीतका शुरु र अन्त्य हुन् भनी बताए। उनले गोपाल योञ्जन विषयमा जति नै शोध गरे पनि पूरा हुँदैन, कारण उनी अथाह हुन्‌ भनी बताए। सङ्गीतकार रुपेस रसाइलीले विद्यार्थी नानीहरुलाई सम्बोधन गर्दै सङ्गीत शुरु गर्नु हो भने गोपाल योञ्जनबाट शुरु गरेर गोपाल योञ्जनमा नै अन्त्य गर्नुपर्छ भनी सुझाउ दिए। उनले गोपाल योञ्जन सङ्गीतमा हिमाल जस्तो उच्च रहेको अनि समुन्द्र जस्तो गहिरो रहेको बताए।

कार्यक्रममा यसपाली सङ्गीतकार बरुण रसाइली र गीतकार सुकुमार बराईलीलाई गोपाल योञ्जन सङ्गीत सम्मानले सम्मानित गरियो। कार्यक्रममा प्रमुख अतिथि वरिष्ठ सङ्गीतकार बसन्त छेत्रीले आफ्नो सम्बोधनमा गोपाल योञ्जनसितको सामिप्य, कार्य र सांगीतिक यात्रा विषयमा आफ्ना अनुभवहरु साझा गरे। उनले आफु कार्यक्रममा उभिएको पनि गोपाल‌ योञ्जनको कारणले रहेको बताउँदै आफु 50-55 वर्ष अघि तीनधारे आएर यही महात्मा गाँधी हलमा कार्यक्रम गरेको सम्झना साझा गरे।

कार्यक्रमका विशिष्ट अतिथि जीटीएको सूचना अनि सांस्कृतिक विभागको कार्यकारी सभासद अनोश थापाले तीनधारे तीनवटा धाराहरु साहित्य, सङ्गीत र कला भएको ठाउँ रहेको र यो कलाकारहरु मौलिने ठाउँ रहेको बताए। उनले गोपाल योञ्जन जयन्ती र सम्मान कार्यक्रमको प्रशंसा गरे। कार्यक्रममा गोपाल योञ्जनका गीतहरु प्रस्तुत गर्ने कलाकारहरुलाई गौरव मञ्च तीनधारेको तर्फबाट स्मृति चिन्ह प्रदान गरेर सम्मान जनाइयो। कार्यक्रममा धन्यवाद ज्ञापन गायक महेश सेवाले राखेका थिए।

हिन्दुस्थान समाचार / हनोक