डोंगरगढ़/रायपुर, १० अक्टोबर (हि.स.)। छत्तीसगढ़को राजनान्दगाउँ जिल्ला स्थित डोंगरगढ़ पुलिस थाना क्षेत्रको चौथना गाउँमा घरभित्र प्रवेश गरी आमा र छोराको निर्मम हत्या गरिएको छ। यस घातक आक्रमणमा परिवारकी छोरी गम्भीर घाइते भएकी छन्। उनलाई उपचारका लागि रायपुरस्थित अस्पतालमा भर्ती गरिएको छ।
अज्ञात आक्रमणकारीले धारिलो हतियारले प्रहार गरी आमा कमला सोनकर र छोरा हितेन्द्र सोनकरको हत्या गरे। आक्रमणमा छोरी ममता सोनकर गम्भीर घाइते भएकी छन्। उनको रायपुर स्थित डीकेएस अस्पतालमा उपचार भइरहेको छ।
यस सनसनीपूर्ण घटनापछि सम्पूर्ण क्षेत्रमा त्रास र कोकोहोलो मच्चिएको छ। घटनाको सूचना प्राप्त हुनासाथ पुलिस घटनास्थलमा पुगेर अनुसन्धानमा जुटेको छ।
पुलिसबाट प्राप्त जानकारी अनुसार, घटना ९ अक्टोबर २०२६ को राति लगभग ८:३० देखि ९:३० बजीबीच भएको अनुमान गरिएको छ। घटनाका बेला मृतक कमला सोनकरका पति घर बाहिर थिए।
प्रारम्भिक जानकारीअनुसार, घटना पछाड़ी पारिवारिक वैमनस्य रहेको आशंका गरिएको छ। पुलिसले अहिलेसम्म कुनै पनि आरोपीको नाम सार्वजनिक गरेको छैन र कसैलाई पक्राउ गरिएको आधिकारिक जानकारी पनि दिएको छैन।
पुलिस उपाधीक्षक सुमन जायसवालको नेतृत्वमा पुलिस टोलीहरूले घटनासँग सम्बन्धित प्रमाण सङ्कलन गरिरहेका छन्। यद्यपि, प्रारम्भिक अनुसन्धानका आधारमा परिवारकै एक नजिकका आफन्तमाथि गम्भीर शङ्का गरिएको छ। पुलिसले उनीसँग सोधपुछ गर्ने तयारी गरिरहेको छ।
हिन्दुस्थान समाचार / भवानी थामी
