खरसाङ, 13 अक्टोबर (हि.स.)। नेपालमा सञ्चालन भइरहेको गायन प्रतियोगिता ‘नेपाल सिङ्गिङ सुपरस्टार’ को शीर्ष ७ मा स्थान बनाउन सफल दार्जिलिङ पहाडका दुई प्रतिभाशाली कलाकार रजत सुब्बा र रितेस छेत्रीलाई विजयी बनाउन खरसाङमा आयोजित पत्रकार सम्मेलनमार्फत व्यापक मतदानको अपील गरिएको छ।
प्रतियोगिताको शीर्ष ७ मा पुग्न सफल रजत सुब्बा सोनादा क्षेत्रअन्तर्गत मार्गरेट्स होप चियाबारीका निवासी हुन् भने रितेस छेत्री दार्जिलिङको लेबोङ निवासी हुन्। दुवै कलाकारलाई प्रतियोगिताको आगामी चरणमा पुर्याउन र अन्तिम चरणसम्मको यात्रा सुनिश्चित गर्न सबैसँग भोट, साथ र सहयोगको अपील गरिएको हो।
पत्रकार सम्मेलनमा कलाकार एवं अखिल भारतीय गोर्खा कलाकार सङ्घका अध्यक्ष तथा भारत-नेपाल कलाकार संयोजक नसीब मुखिया, नेपाल आइडल सिजन ५ का अन्तिम चरणका प्रतियोगी मोहित भुजेल, कलाकार शिशिर लिम्बू तथा नेपाल सिङ्गिङ सुपरस्टारका प्रतियोगी रजत सुब्बा र रितेस छेत्री उपस्थित थिए।
नसीब मुखियाले रजत सुब्बा र रितेस छेत्रीले दार्जिलिङ पहाडको प्रतिनिधित्व गर्दै नेपालमा आयोजित गायन प्रतियोगितामा उत्कृष्ट प्रदर्शन गरिरहेको बताए। उनले दुवै कलाकारले आफ्नो प्रतिभामार्फत पहाडको नाम उज्ज्वल बनाइरहेको उल्लेख गर्दै उनीहरूलाई अधिकभन्दा अधिक भोट दिएर विजयी बनाउन सबैसँग आग्रह गरे।
पत्रकार सम्मेलनमा प्रतियोगी रजत सुब्बा र रितेस छेत्रीले पनि सञ्चारकर्मीहरूमार्फत आफ्ना समर्थक तथा शुभचिन्तकहरूसमक्ष भोटको अपिल गरे। उनीहरूले भोट गर्ने प्रक्रिया र आफूहरूलाई सहयोग गर्न सकिने तरिकाबारे विस्तृत जानकारी गराए।
हिन्दुस्थान समाचार / हनोक
