खरसाङ, १४ अक्टोबर (हि.स.)। खरसाङ नगरपालिका क्षेत्रअन्तर्गत प्रधानमन्त्री आवास योजना (हाउस फर अल) का लाभार्थीहरूलाई लिएर मंगलबार खरसाङको पार्क लोकेशनस्थित सार्वजनिक भवनमा सभा सम्पन्न भयो। रामकृष्ण शर्माको पहलमा आयोजित सभामा योजनाका लाभार्थीहरूका साथै विभिन्न वार्डका प्रतिनिधिहरूको उपस्थिति रहेको थियो।
सभामा हाउस फर अल योजनासँग सम्बन्धित विभिन्न विषयमा चर्चा-परिचर्चा गरियो। सभाले यस योजनालाई लिएर निरन्तर रूपमा बैठक आयोजना गर्ने निर्णय गरेको छ। साथै, प्रधानमन्त्री आवास योजनाको नयाँ चरण लागू हुनुअघि पुरानो योजनाअन्तर्गतका सबै बाँकी काम तथा भुक्तानी पूरा गर्नुपर्ने माग पनि अघि सारिएको छ।
हाउस फर अल योजनाअन्तर्गत खरसाङ नगरपालिका क्षेत्रका लाभार्थीहरूको खातामा आर्थिक वर्ष २०१५-१६ को रकम आउन थालेपछि लाभार्थीहरूले खुशी व्यक्त गरेका छन्।
सभापछि पत्रकारहरूसँग कुराकानी गर्दै रामकृष्ण शर्माले लाभार्थीहरूको खातामा आर्थिक वर्ष २०१५-१६ को रकम आउन थालेको बताए। उनले खरसाङ नगरपालिकाले आवश्यक जानकारीसहितको प्रतिवेदन समयमा बुझाएको खण्डमा आर्थिक वर्ष २०१८-१९ र २०१९-२० को रकमसमेत प्राप्त हुने बताए। सरकार रकम उपलब्ध गराउन तयार रहेको उनको भनाइ थियो।
शर्माले लाभार्थीहरूको खातामा रकम आउन थाल्नु उनीहरूको सामूहिक प्रयासको सफलता भएको उल्लेख गर्दै यसलाई सम्पूर्ण लाभार्थीहरूको जितका रूपमा व्याख्या गरे।
उनका अनुसार, खरसाङ नगरपालिका क्षेत्रका हाउस फर अल योजनाका लाभार्थीहरूलाई समेटेर निरन्तर बैठकहरू आयोजना गरिँदै आएको छ। यस विषयमा खरसाङ नगरपालिकालाई विस्तृत जानकारी गराउनुका साथै खरसाङका महकुमा शासकसमक्ष ज्ञापनपत्रसमेत बुझाइएको उनले बताए।
हिन्दुस्थान समाचार / हनोक
