नाम्ची, 05 अक्टोबर (हि.स.)।याङ्गाङ-राङ्गाङ निर्वाचन क्षेत्रका लाभार्थीहरूलाई समेट्दै याङ्गाङ खण्ड प्रशासनिक केन्द्र (बीएसी) अन्तर्गत् राभाङ्लाको प्लाजामा सिक्किम आमा सशक्तिकरण योजना (एसएएसवाई) 2026 का रहल चेक वितरण कार्यक्रम सफलतापूर्वक सम्पन्न भएको छ।

यस कार्यक्रममा सिक्किम विधानसभाकी उपाध्यक्ष तथा राङ्गाङ-याङ्गाङ निर्वाचन क्षेत्रकी विधायक राजकुमारी थापा मुख्य अतिथिका रूपमा उपस्थित रहेकी थिइन्।

दुईदिने चेक वितरण कार्यक्रममार्फत बीएसी याङ्गाङअन्तर्गत सबै छः वटा ग्राम पञ्चायत एकाइ (जीपीयू) का कुल 1,000 लाभग्राहीलाई समेटियो।

3 अक्टोबरको दिन कोल्थाङ-तोक्दे जीपीयू, नेया-माङ्जिङ जीपीयू, याङ्गाङ-राङ्गाङ जीपीयू र श्रीपताम-गाग्योङ जीपीयूका 727 जना तथा सङ्घका थप 14 जना लाभग्राहीलाई चेक वितरण गरिएको थियो, जसले गर्दा पहिलो दिन समेटिएका लाभग्राहीहरूको कुल सङ्ख्या 741 पुगेको थियो।

दोस्रो दिन, राभाङ-खोप जीपीयू र साङ्मु-राङ्की जीपीयूका बाँकी 273 लाभग्राहीले राभाङ्लाको प्लाजामा आफ्ना चेकहरू प्राप्त गरे। यससँगै बीएसी याङ्गाङअन्तर्गत् सबै 1,000 लाभग्राहीका लागि वितरण कार्य सम्पन्न भयो।

कार्यक्रममा खाद्य तथा प्रशोधन विभागका सल्लाहकार सीएल गुरुङ, विधायककी विशेष कर्तव्य अधिकारी डेन्किला भोटिया, कृषि विभागका विशेष कर्तव्य अधिकारी एसबी राईसहित अन्यको उपस्थिति रहेको थियो।

सिक्किम आमा सशक्तिकरण योजना सिक्किम सरकारको एक प्रमुख कल्याणकारी पहल हो, जसको उद्देश्य योग्य आमाहरूको आर्थिक सुरक्षा, सम्मान र सशक्तिकरणलाई सुदृढ़ पार्नु हो। मुख्यमन्त्री पीएस गोलेको नेतृत्वमा सञ्चालित यस योजनाअन्तर्गत योग्य लाभग्राहीहरूलाई वार्षिक 40 हजार रुपियाँको आर्थिक सहायता प्रदान गरिन्छ। यो रकम 20-20 हजार रुपियाँको दरमा दुई किस्तीमा वितरण गरिन्छ।

यस आर्थिक सहायताको उद्देश्य आमाहरूलाई परिवारका अत्यावश्यक आवश्यकता पूरा गर्न सहयोग गर्नु हो, जसमा बालकबालिकाको शिक्षा, घरायसी आवश्यकता र साना-ठूला कृषि वा अन्य आयार्जन गर्ने गतिविधिजस्ता जीविकोपार्जनमुखी कार्यहरू समावेश छन्।

यस योजनाले परिवार र समुदायलाई सुदृढ़ बनाउनमा आमाहरूले निर्वाह गर्ने महत्त्वपूर्ण भूमिकालाई मान्यता दिने राज्य सरकारको निरन्तर प्रयासलाई झल्काउँछ।

उक्त कार्यक्रमले प्रत्यक्ष आर्थिक सहायता र महिलाकेन्द्रित कल्याणकारी पहलमार्फत सम्पूर्ण सिक्किमका आमाहरूमाझ अझ बढ़ी आर्थिक सुरक्षा, सम्मान र सशक्तिकरणलाई प्रवर्द्धन गर्ने लक्ष्य राखेको छ।

सिक्किम आमा सशक्तिकरण योजना महिला कल्याण र सशक्तिकरणतर्फ राज्य सरकारका बृहत्तर प्रयासहरूको एक हिस्सा हो। यसमा आमा सम्मान दिवसजस्ता पहलहरू पनि समावेश छन्, जसले राज्यभरिका आमाहरूको अमूल्य योगदानलाई सम्मान र उत्सवका रूपमा मनाउँछन्।

यस्ता कल्याणकारी पहलहरूमार्फत सरकारले परिवारलाई सुदृढ़ बनाउने, आमाहरूलाई सहयोग गर्ने र सम्पूर्ण सिक्किममा समावेशी विकासलाई प्रवर्द्धन गर्ने प्रयासहरू जारी राखेको छ।

---------------

हिन्दुस्थान समाचार / बिशाल