अयोध्या, ०७ नोभेम्बर (हि.स.)। भगवान् रामको नगरी अयोध्या पुनः रामायणका कथाहरूको रङमा रङ्गिएको छ। सड़कमा सजाइएका रामायणका प्रसङ्गमा आधारित झाँकी, लोकगीतको गुञ्जन तथा विभिन्न क्षेत्रका परम्परागत लोक नृत्यले दीपोत्सवको दशौं आयोजनाको शुरुआतलाई विशेष बनाएको छ। शनिवार पर्यटन तथा संस्कृति मन्त्री जयवीर सिंहले साकेत महाविद्यालयदेखि रामकथा पार्कसम्म निकालिने भव्य शोभायात्रालाई हरियो झण्डा देखाएर प्रस्थान गराए। यससँगै अयोध्यामा दीपोत्सव–२०२६ को उत्सव शुरु भएको छ।
यस शोभायात्रामा सहभागी झाँकीहरू रामायणका सात वटा काण्ड– बालकाण्ड, अयोध्याकाण्ड, अरण्यकाण्ड, किष्किन्धाकाण्ड, सुन्दरकाण्ड, लङ्काकाण्ड र उत्तरकाण्डमा आधारित छन्। यी झाँकी मार्फत भगवान् श्रीरामको जीवनका विभिन्न प्रसङ्गलाई आकर्षक रूपमा प्रस्तुत गरिएको छ। भगवान् श्रीरामको जीवनका विभिन्न घटनादेखि उनको अयोध्या आगमनसम्मको कथालाई जीवन्त रूपमा देखाइएको छ। यी झाँकीहरूले शहरका सार्वजनिक स्थलहरूलाई रामकथाको रङमा रङ्गाएका छन्। शोभायात्राको उद्देश्य रामायणका प्रसङ्गहरू प्रदर्शन गर्नुका साथै मानिसहरूलाई आफ्नो सांस्कृतिक तथा धार्मिक सम्पदासँग जोड्नु पनि रहेको छ।
भव्य शोभायात्रामा प्रदेशको लोक संस्कृतिका विविध रङ
दीपोत्सव–२०२६ को यस भव्य शोभायात्रामा उत्तर प्रदेशका विभिन्न क्षेत्रका लोक कला तथा परम्परागत नृत्यहरूको आकर्षक प्रस्तुति गरियो। मथुराको मयूर नृत्य र बम रसिया, प्रयागराजको ढेढिया नृत्य, बाँदाको पाइ डण्डा, सोनभद्रको मादल र सिंघा, अयोध्याको बधावा, गाजीपुरको धोबिया, गोरखपुरको वनटाङ्गिया, अयोध्या र गोरखपुरको फरवाही तथा सुलतानपुरको नटवरी नृत्यले दर्शकहरूको ध्यान आकर्षित गर्यो।
शोभायात्रामा उत्तराखण्डको परम्परागत लोक नृत्य पनि प्रस्तुत गरियो। यी लोक कलाहरूले रामनगरीका सड़कहरूमा देशका विविध सांस्कृतिक परम्पराहरूको सुन्दर झलक प्रस्तुत गरे। शोभायात्रासँगै शुरु भएको यो उत्सव दिनभरि सञ्चालन हुने दीपोत्सवका विभिन्न कार्यक्रमहरूको पहिलो चरण हो।
पर्यटन तथा संस्कृति मन्त्री जयवीर सिंहले भगवान् रामको अयोध्या, सम्पदा र आस्थाको अयोध्यामा अहिले हर्षोल्लासको वातावरण रहेको बताए। दीपोत्सवलाई लिएर सम्पूर्ण रामनगरी उत्साह र उमङ्गले भरिएको छ। साल २०२६ को दीपोत्सवले पनि विगत नौ वर्षका सबै कीर्तिमानलाई पछाड़ी पार्दै नयाँ इतिहास रच्ने उनले बताए। यो आयोजना भगवान् श्रीरामप्रतिको जनजनको आस्था, प्रदेशको समृद्ध सांस्कृतिक सम्पदा तथा मानिसहरूको सामूहिक सहभागिताको प्रतीक बनेको छ।
पर्यटन तथा संस्कृति मन्त्रीले मुख्यमन्त्री योगी आदित्यनाथको नेतृत्वमा साल २०१७ देखि दीपोत्सव निरन्तर भव्य स्वरूपमा आयोजना हुँदै आएको पनि बताए। यो आयोजनाले अहिले आस्था, संस्कृति र जनसहभागिताको ठूलो उत्सवका रूपमा आफ्नो पहिचान स्थापित गरेको छ। दीपोत्सवले अयोध्यालाई प्रमुख पर्यटकीय केन्द्रका रूपमा चिनाउन महत्त्वपूर्ण भूमिका खेलेको उनले बताए। प्रत्येक वर्ष यस आयोजनाको विस्तारले अयोध्याको सांस्कृतिक सम्पदालाई नयाँ पहिचान दिनुका साथै यहाँको पर्यटन सम्भावनालाई पनि मजबुत बनाउँदै आएको छ।
उपराष्ट्रपति सी.पी. राधाकृष्णनले दशौं दीपोत्सव–२०२६ को शुभारम्भ गर्ने
रामनगरी अयोध्या पुनः भव्य दीपोत्सवका लागि तयार भएको छ। दशौं दीपोत्सव–२०२६ को शुभारम्भ पूज्य सन्त तथा धर्माचार्यहरूको उपस्थितिमा उपराष्ट्रपति सी.पी. राधाकृष्णनले गर्नेछन्। यस अवसरमा राज्यपाल आनन्दीबेन पटेल र मुख्यमन्त्री योगी आदित्यनाथ पनि उपस्थित रहनेछन्।
दीपोत्सवका क्रममा सरयू नदीका ५६ वटा घाट असङ्ख्य दीपहरूले झिलिमिली हुनेछन् भने श्रीराम जन्मभूमि मन्दिरलाई रङ्गीचङ्गी बत्तीहरूले भव्य रूपमा सजाइनेछ।
हिन्दुस्थान समाचार / भवानी थामी
