उज्जैन/भोपाल, 08 नोभेम्बर (हि.स.)। मध्यप्रदेशमा आइतबार दीपावली पर्व हर्षोल्लास र उत्साहका साथ मनाइँदैछ। घरदेखि मन्दिरसम्म दीपोत्सवको रौनक देखिएको छ। आइतबार बिहानै उज्जैनस्थित विश्वप्रसिद्ध ज्योतिर्लिङ्ग भगवान् महाकालेश्वर मन्दिरमा विशेष पूजाअर्चना र भस्म आरतीसँगै पर्वको शुरुवात गरियो। प्रदेशवासीले एकअर्कालाई सुख, समृद्धि र खुसीको कामना गर्दै दीपावलीको शुभकामना दिइरहेका छन्।

धार्मिक नगरी उज्जैनमा दीपावलीको विशेष उत्साह देखियो। बिहानै भस्म आरतीका क्रममा भगवान् महाकाललाई अभ्यङ्ग स्नान गराइएको थियो। पुजारी परिवारका महिला तथा बालबालिकाले भगवानलाई उबटन लगाइदिए भने पुजारीहरूले तातो पानीले स्नान गराएका थिए। त्यसपछि भगवान्लाई अन्नकूटको भोग अर्पण गरियो।

मन्दिरको परम्पराअनुसार, दीपावलीका अवसरमा आरतीका क्रममा झिलिमिली बत्ती बालेर उत्सवको शुरुवात गरिएको थियो। मन्दिरमा दीपावलीका दिन हुने चारवटै आरतीमा झिलिमिली बत्ती बाल्ने परम्परा छ। यसमा बिहानको भस्म आरती, अभ्यङ्ग स्नानपछिको आरती, सन्ध्याकालीन आरती र शयन आरती समावेश छन्। प्रत्येक आरतीमा एक एकवटा झिलिमिली बत्ती बालिन्छ।

महाकाल मन्दिरमा चाडपर्व सबैभन्दा पहिले मनाउने परम्परा रहिआएको छ। सोही परम्पराअनुसार धार्मिक विधिविधानका साथ भगवान् महाकालको पूजाअर्चना र अभ्यङ्ग स्नान गरी दीपावलीको शुभारम्भ गरियो। भस्म आरतीका क्रममा श्रद्धालुहरूले भगवानको दर्शन गरी आशीर्वाद लिए। पूजाअर्चना र आरतीका बीच मन्दिर परिसर भक्तिमय बनेको थियो। देशका विभिन्न भागबाट उज्जैन पुगेका श्रद्धालुका लागि दीपावलीमा भगवान् महाकालको दर्शन विशेष आस्थाको केन्द्र बनेको थियो।

राजधानी भोपालमा पनि घरदेखि बजारसम्म दीपावलीको उत्सवी माहोल देखिएको छ। बिहानैदेखि मानिसहरू पूजाको तयारी, घर सजावट तथा दीप प्रज्वलनको तयारीमा जुटेका छन्। साँझ परेपछि शहरका घर, व्यापारिक प्रतिष्ठान र बजारहरू दीप तथा रङ्गीचङ्गी बत्तीले झिलिमिली हुनेछन्। घरहरूमा शुभ मुहूर्तमा भगवान् गणेश र माता लक्ष्मीको पूजाअर्चना गरिनेछ। त्यसपछि आतसबाजीसहित दीपावली मनाइनेछ।

दीपावलीका अवसरमा प्रदेशका अन्य प्रमुख धार्मिक स्थलहरूमा पनि विशेष उत्साह देखिएको छ। मन्दिरहरूमा पूजाअर्चनाका साथै घर तथा व्यापारिक प्रतिष्ठानहरूमा लक्ष्मी गणेश पूजाको तयारी गरिएको छ। बजारमा किनमेल र सजावटका कारण चहलपहल बढेको छ।

दीपावली केवल दीप प्रज्वलन गर्ने पर्व मात्र नभई आस्था, परम्परा र खुसी साटासाट गर्ने अवसर पनि हो। मध्यप्रदेशमा यस पर्वका अवसरमा धार्मिक उत्साह र उत्सवी रौनक एकसाथ देखिएको छ।

हिन्दुस्थान समाचार / भवानी थामी