वाराणसी, ०८ नोभेम्बर (हि.स.)। दीपावलीको पावन अवसरमा आइतवार वाराणसीमा मुस्लिम महिलाहरूले भगवान श्रीराम र माता सीताको आरती उतार्दै सामाजिक सद्भाव, सांस्कृतिक एकता तथा आपसी भाइचाराको सन्देश दिएका छन्।
विशाल भारत संस्थान र मुस्लिम महिला फाउन्डेसनको संयुक्त आयोजनामा लमही स्थित सुभाष भवनमा श्रीराम महाआरती कार्यक्रम आयोजना गरियो। कार्यक्रममा ठूलो सङ्ख्यामा मुस्लिम महिलाहरूले परम्परागत रूपमा सजाइएका आरतीका थालीमा दीप प्रज्वलन गरी श्रद्धापूर्वक सहभागिता जनाए।
महिलाहरूले दीपावली कुनै एक धर्म वा समुदायको पर्व मात्र नभई सम्पूर्ण देशको साझा सांस्कृतिक परम्परा र विरासत भएको बताए।
उनीहरूले आफ्नो धार्मिक पहिचानभन्दा माथि उठेर भारतीय संस्कृति, परम्परा र सामाजिक एकताको सन्देश दिएका छन्।
मुस्लिम महिला फाउन्डेसनकी राष्ट्रिय अध्यक्ष नाजनीन अन्सारीले भारतमा विभिन्न धर्म र पूजापद्धति भए पनि सबैको ऐतिहासिक तथा सांस्कृतिक जरा एकअर्कासँग जोड़िएको बताइन्। भगवान श्रीरामको जीवनबाट त्याग, मर्यादा, समर्पण र राष्ट्रप्रतिको कर्तव्यको प्रेरणा लिन सकिने उनले बताइन्।
विशाल भारत संस्थानका राष्ट्रिय अध्यक्ष डा. राजीवले मुस्लिम महिलाहरूको यो पहलले सामाजिक एकता र सांस्कृतिक सद्भावलाई बलियो बनाउने बताए। त्यस्तै डा. नजमा परवीनले भगवान श्रीरामका आदर्श र रामराज्यको अवधारणा विश्वका लागि पनि प्रेरणादायी रहेको बताइन्।
कार्यक्रममा सहभागी महिलाहरूले भारतीय संस्कृतिको साझा विरासत, धार्मिक सहिष्णुता र सामाजिक एकताको सन्देश दिँदै दीपावली आपसी प्रेम र सद्भावका साथ मनाउन आह्वान गरे।
हिन्दुस्थान समाचार / भवानी थामी
