मिर्जापुर, 0१ जुलाई (हि.स.)। उत्तर प्रदेशको मिर्जापुरमा कोतवाली देहात पुलिसले विवाह गराइदिने प्रलोभन देखाएर ठगी तथा बलजफ्ती रकम असुल्ने एक संगठित गिरोहको पर्दाफास गर्दै पाँच जना अभियुक्तलाई पक्राउ गरेको छ। पुलिसले अभियुक्तहरूको बैंक खातामा जमा १ लाख ३० हजार रुपियाँ होल्ड गराउनुका साथै घटनामा प्रयोग भएका चार वटा मोबाइल फोन र एउटा अर्टिगा कार पनि जफत गरेको छ।

नगर पुलिस अधीक्षकले जानकारी दिए अनुसार, राजस्थानको निवासी पुष्पेन्द्रको उजुरीका आधारमा २९ जूनमा मुद्दा दर्ता गरिएको थियो। उजुरी अनुसार २८ जूनमा उनका दुई जना आफन्तलाई विवाह गराइदिने बहानामा मिर्जापुरको लोहन्दी कला स्थित हनुमान मन्दिरमा बोलाइएको थियो, जहाँ उनीहरूलाई ठगी गरिएको र ज्यानले मार्ने धम्की दिँदै बलजफ्ती रकम असुलिएको थियो।

उनी अनुसार, पुलिस अधीक्षकको निर्देशमा अतिरिक्त पुलिस अधीक्षक (नगर) तथा क्षेत्राधिकारी सदरको नेतृत्वमा गठन गरिएको टोलीले घटनाको अनुसन्धान शुरु गर्यो। साइबर सेलको सहयोगमा अभियुक्तहरूको बैंक खातामा रहेको १ लाख ३० हजार रुपियाँ होल्ड गराइएको छ।

पुलिसले कारबाहीका क्रममा लोहन्दी कला क्षेत्रबाट लवकुश यादव, गुड़िया यादव, राधा कोल, दीपक पाल तथा राजेन्द्र कुमार यादवलाई पक्राउ गरेको छ। उनीहरूदेखि घटनामा प्रयोग भएका चार वटा मोबाइल फोन र एउटा अर्टिगा कार जफत गरिएको पुलिसले जनाएको छ।

पुलिसले पक्रा परेका अभियुक्तहरूसँग थप सोधपुछ गरिरहेको छ। साथै गिरोहका अन्य सदस्यहरूको पहिचान तथा यस्तै प्रकारका अन्य घटनाहरूमा उनीहरूको संलग्नता रहेको वा नरहेको विषयमा पनि अनुसन्धान जारी रहेको छ।

हिन्दुस्थान समाचार / भवानी थामी