गान्तोक, 17 जुलाई (हि.स.)। राजधानी नजिक जेएन रोडको ७ माइलस्थित प्रभावित क्षेत्रमा निरन्तर भइरहेको भूस्खलन तथा सडकको बिग्रँदै गएको अवस्थाको मूल्याङ्कन गर्न १७ जुलाईमा गान्तोकका अतिरिक्त जिल्लापाल सिसुम वाङ्चुक भोटियाको नेतृत्वमा दोस्रो संयुक्त निरीक्षण सम्पन्न भयो। निरीक्षणमा काबी लुङ्चोक निर्वाचन क्षेत्रका विधायकका ओएसडी,

क्योङ्नोस्ला जीपीयूका जिल्ला सदस्य तथा पञ्चायत सदस्यहरू

जिल्ला आपदा प्रबन्धन प्राधिकरण, गान्तोकका संयुक्त निर्देशक,

धार्मिक मामिला विभागका संयुक्त निर्देशक तथा अन्यहरू सामेल थिए।

कार्यक्रमको प्रारम्भमा जिल्ला आपदा प्रबन्धन प्राधिकरण, गान्तोकका संयुक्त निर्देशकले अघिल्लो निरीक्षणका निष्कर्ष प्रस्तुत गर्दै सडक तथा आसपासका ढलानहरूको अवस्था अझ बिग्रिएको जानकारी दिए। उनले सबै सम्बन्धित विभागहरूबीच समन्वयात्मक प्रयासमार्फत क्षतिको विस्तृत मूल्याङ्कन गरी जोखिम न्यूनीकरणका उपयुक्त उपायहरू अवलम्बन गर्नुपर्ने आवश्यकता औँल्याए। साथै, श्रम विभागको एक भवनलाई अस्थायी राहत शिविरका रूपमा प्रयोग गरिएको र त्यहाँ हाल पाँच प्रभावित परिवारलाई आश्रय दिइएको जानकारी पनि गराइयो।

अतिरिक्त जिल्लापालले सम्बन्धित विभागहरूलाई आफ्नो कार्यक्षेत्रभित्र तत्काल आवश्यक कदम चाल्न निर्देशन दिनुभयो। ग्रेफलाई बाढीले बगाएको सडकको पुनःस्थापना कार्य तत्काल शुरु गर्न तथा जमिनबाट निस्कने पानीको उचित निकासको व्यवस्था गर्न निर्देशन दिइयो। भवन तथा आवास विभागलाई प्रभावित संरचनाहरू (गुम्बा, मन्दिर तथा आवासीय भवनहरू) को विस्तृत संरचनात्मक मूल्याङ्कन प्रतिवेदन तयार गर्न लगाइएको छ। त्यस्तै, खानी, खनिज तथा भूगर्भ विभागलाई निरन्तर भू-धसाइ गराइरहेको पानीको स्रोत पहिचान गर्न तथा उक्त क्षेत्रको भू-स्थायित्वको अध्ययन गर्न निर्देशन दिइयो। सबै सम्बन्धित विभागहरूलाई आगामी सोमबारभित्र आफ्नो मूल्याङ्कन प्रतिवेदन प्राधिकरण, गान्तोकमा पेश गर्न निर्देश दिएको छ।

बैठकपछि निरीक्षण टोलीले प्रभावित सडक खण्ड तथा आवासीय क्षेत्रको स्थलगत अवलोकन गर्यो। निरीक्षणका क्रममा निरन्तर जमिन सरिरहेको कारण धेरै घरहरूमा थप क्षति पुगेको तथा घरमुनि र वरिपरि ठूलो मात्रामा भूस्खलन भएको पाइयो। टोलीले उक्त क्षेत्रलाई अत्यन्त अस्थिर तथा बसोबासका लागि असुरक्षित रहेको निष्कर्ष निकालेको छ।

जिल्ला प्रशासनले प्रभावित सबै नागरिकहरूको सुरक्षा र कल्याण सुनिश्चित गर्न पूर्ण प्रतिबद्धता व्यक्त गर्दै सम्बन्धित सबै विभागहरूसँग समन्वय गरी अवस्थाको निरन्तर निगरानी गरिरहेको जनाएको छ।

---------------

हिन्दुस्थान समाचार / बिशाल