जयपुर, २ जुलाई (हि.स.)। भ्रष्टाचार निवारण ब्युरो (एसीबी) ले बिहिवार जयपुर नगर निगमको हवामहल–आमेर जोनस्थित पट्टा/लिज शाखामा छापा मारेर एक कार्यालय जमादारलाई ५० हजार रुपियाँ घुस लिँदै गरेको अवस्थामा पक्राउ गरेको छ। आरोपी जमादारले निवेदकका बुबाको नाममा घरको पट्टा जारी गरिदिने भन्दै २ लाख रुपियाँ घुस मागेका थिए।
एसीबीका पुलिस महानिदेशकले पक्रा परेको आरोपी जमादार रामसिंह यादव (२८), श्रीमाधोपुर (सीकर) निवासी रहेको र हाल जयपुर नगर निगमको हवामहल–आमेर जोनको पट्टा/लिज शाखामा कार्यरत रहेको जानकारी दिए।
उनी अनुसार, एसीबी मुख्यालयको जयपुर नगर तृतीय टोलीमा निवेदकका पिताको नाममा घरको पट्टा जारी गरिदिने बदलामा आरोपीले २ लाख रुपियाँ घुस मागिरहेको भन्ने उजुरी प्राप्त भएको थियो। उजुरीको सत्यता पुष्टि गरेपछि एसीबीले ट्र्यापको योजना बनाएको थियो।
यस क्रममा एसीबीका अतिरिक्त पुलिस अधीक्षकको नेतृत्व तथा उप अधीक्षकको टोलीले कारबाही गर्दै आरोपी जमादारलाई ५० हजार रुपियाँ घुस लिँदै गरेको अवस्थामा रंगेहात पक्राउ गरेको हो।
हिन्दुस्थान समाचार / भवानी थामी
