गान्तोक, 20 जुलाई (हि.स.)। मुख्यमन्त्री प्रेमसिंह तामाङले सिक्किम देशको सबैभन्दा प्रगतिशील राज्यहरू मध्ये एकको रूपमा देखा परेको बताएका छन्। उनले विगत आठ वर्षमा १२.६ प्रतिशतभन्दा बढीको औसत वास्तविक सकल राज्य घरेलू उत्पाद (जीएसडीपी) वृद्धि रेकर्ड गरेको जानकारी गराएका छन्। आजदेखि शुरू भएको चार दिवसीय बजेट अधिवेशनमा बजेट पेश गर्ने क्रममा मुख्यमन्त्रीले उक्त कुरा भनेका हुन्।
मुख्यमन्त्रीले राज्यमा प्रतिव्यक्ति जीएसडीपी देशमै सबैभन्दा बढी रहेको बताउॅंदै मानव विकास, गरिबी न्यूनीकरण र घरपरिवारको आयमा उल्लेखनीय सुधार आएको बताए। उनले सुशासन, रणनीतिक लगानी र नागरिक-केन्द्रित विकास मार्फत १३ प्रतिशतभन्दा बढीको औसत वार्षिक जीएसडीपी वृद्धि कायम राख्ने लक्ष्य राखेको उनले बताए।
मुख्यमन्त्रीले सदनलाई जानकारी गराउॅंदै भने, सिक्किमको हालको मूल्यमा जीएसडीपी २०२६-२७ मा ६२,९७३ करोड रूपियॉं अनुमान गरिएको छ। सरकारले राज्यको राजस्वमा वृद्धि, विवेकपूर्ण वित्तीय व्यवस्थापन र भारत सरकार र बाह्य सहायता प्राप्त परियोजनाहरूबाट थप स्रोतहरूको परिचालन मार्फत सार्वजनिक लगानीलाई उल्लेखनीय रूपमा विस्तार गरेको छ।
उनले आफ्नो सम्बोधनको क्रममा प्रमुख क्षेत्रहरूमा नयाँ पहलहरूको श्रृंखला पनि घोषणा गरे। उनले कृषि अर्थतन्त्रलाई सुदृढ पार्न सरकारले राज्य ब्याज अनुदान योजना शुरु गर्ने बताए, जस अन्तर्गत किसान क्रेडिट कार्ड बाली ऋण समयमै भुक्तानी गर्ने योग्य किसानहरूले एक प्रतिशतको प्रभावकारी ब्याज दरमा ऋण प्राप्त गर्न सक्नेछन्।
उनले सर्वाइकल क्यान्सर उन्मूलनको लागि ३० देखि ६५ वर्ष उमेरका लगभग १.५ लाख महिलाहरूलाई समेट्ने राज्यव्यापी मानव प्यापिलोमा भाइरस (एचपीवी) जॉंच कार्यक्रमको घोषणा गरे। यसैगरी, उनले चालू वित्तीय वर्षमा एसटीएनएम अस्पतालमा सिक्किमको पहिलो मिर्गौला प्रत्यारोपण कार्यक्रम सञ्चालन गर्ने घोषणा पनि गरे, जसले गर्दा बिरामीहरू राज्य भित्रै मिर्गौला प्रत्यारोपण गर्न सक्षम हुनेछन्।
उनले सोच्यागाङमा रहेको सिक्किम सरकारी मेडिकल कलेज शैक्षिक वर्ष २०२६-२७ देखि वार्षिक १०० एमबीबीएस विद्यार्थीहरूको प्रवेशबाट शुरु हुने र राज्यको घट्दो प्रजनन दरलाई सम्बोधन गर्न एसटीएनएम अस्पतालमा सहायक प्रजनन प्रविधि केन्द्र स्थापना गर्ने घोषणा गरे। सरकारले ५४६ करोड रूपियाँको अनुमानित लागतमा म्यास्टिक प्रयोग गरेर राज्यभरि लगभग ५७० किलोमिटर सडकहरू स्तरोन्नति गर्ने पनि जानकारी गराए। उनले यो पहलले सडकको स्थायित्वमा सुधार गर्ने, राम्रो सबै मौसमी कनेक्टिभिटी सुनिश्चित गर्ने र मर्मत लागत घटाउने बताए।
उनले सिक्किमको समृद्ध सांस्कृतिक सम्पदाको संरक्षणको महत्त्वमा जोड दिँदै सरकारले सिक्किम कला, संस्कृति र सम्पदा विकास बोर्ड, सिक्किम अकादमी र तिब्बत विज्ञान संस्थानलाई निरन्तर सहयोग गर्ने बताए। उनले अलैंची, मेरो धन मिशन मार्फत राज्यको ठूलो अलैंची क्षेत्रलाई पुनर्जीवित गर्ने उपायहरूको पनि घोषणा गरे, जसमा वैज्ञानिक अनुसन्धान, रोग प्रतिरोधी प्रजातिहरू र किसान क्षेत्र प्रयोगशालाहरू समावेश छन्।
हिन्दुस्थान समाचार / बिशाल
21 Jul 2026
