गान्तोक, 03 जुलाई (हि.स.)। सिटिजन एक्सन पार्टी (सीएपी) सिक्किमको अखिल सिक्किम अनुसूचित जनजाति कल्याण परिषद्ले रम्फू पुलिस थानामा परिषद्की संयोजक सुष्मा तामाङमाथि गरिएको कथित अश्लील, मानहानिपूर्ण तथा अपमानजनक अनलाइन उत्पीडनमा संलग्न व्यक्तिविरुद्ध तत्काल कानुनी कारबाही गर्न माग गरेको छ।
परिषद्ले आज जारी एक प्रेस विज्ञप्तिमा गत 30 जून, 2026 मा सीएपी सिक्किमको आधिकारिक फेसबुक पेजमा प्रकाशित भिडियोमा सुष्मा तामाङले टिप्पणी गरेकी थिइन् बताइएको छ। त्यसपछि “विवेक शर्मा” नामक एक फेसबुक प्रयोगकर्ताले तामाङविरुद्ध अश्लील, मानहानिपूर्ण तथा यौनजन्य आशय भएका टिप्पणीहरू गरेको आरोप लगाइएको छ। उक्त व्यक्तिले सीएपी सिक्किमका अध्यक्ष गणेश कुमार राईसँग सुष्मा तामाङको नाम जोडेर उनको चरित्र हत्या गर्ने तथा सार्वजनिक रूपमा अपमानित गर्ने प्रयास गरेको पनि उजुरीमा उल्लेख गरिएको छ।
परिषद्ले पुलिससँग सम्बन्धित फेसबुक पेजको वास्तविक सञ्चालकको पहिचान गर्न, सबै विद्युतीय प्रमाण सुरक्षित राख्न, सामाजिक सञ्जाल प्लेटफर्मबाट आवश्यक डिजिटल अभिलेख प्राप्त गर्न तथा कानुनबमोजिम निष्पक्ष, शीघ्र र प्रभावकारी अनुसन्धान अघि बढाउन आग्रह गरेको छ।
परिषद्ले लोकतान्त्रिक तथा राजनीतिक गतिविधिमा सक्रिय अनुसूचित जनजाति समुदायका महिलामाथि गरिने दुर्व्यवहार, धम्की र अनलाइन उत्पीडन संवैधानिक लोकतन्त्रमा कुनै पनि हालतमा स्वीकार्य हुन नसक्ने जनाएको छ। यस्ता कार्यले जनजातीय समुदायका महिलाको सम्मान, सुरक्षा र समान सहभागितामाथि आघात पुऱ्याउने भएकाले दोषीमाथि कडा कानुनी कारबाही हुनुपर्ने धारणा परिषद्ले व्यक्त गरेको छ।
हिन्दुस्थान समाचार / बिशाल
