गान्तोक, १४ सेप्टेम्बर (हि.स.)। मुख्यमन्त्री प्रेमसिंह तामाङले सोमबार गणेश चतुर्थी र तीजको शुभ अवसरमा लुम्सेस्थित नवनिर्मित जनसेवा भवन (मिनी सचिवालय) मा वास्तु पूजा गरे। मुख्यमन्त्रीले यो भवन केवल नयाँ सरकारी भवन मात्र नभई शासन व्यवस्थालाई जनताको अझ नजिक पुर्याउने तथा सरकारी सेवा प्रवाहलाई सरल, छिटो र सहज बनाउने दिशामा अर्को महत्वपूर्ण कदम रहेको बताएका छन्।
मुख्यमन्त्रीले सामाजिक सञ्जालमार्फत जनाएअनुसार, जनसेवा भवनको हालै सिक्किम भ्रमणका क्रममा प्रधानमन्त्री नरेन्द्र मोदीले भर्चुअल माध्यमबाट उद्घाटन गरेका थिए। यो भवन राज्यमा सार्वजनिक पूर्वाधारलाई सुदृढ बनाउने र शासन व्यवस्थालाई जनताको नजिक पुर्याउने दिशामा महत्वपूर्ण पहल भएको उनले बताए।
उनले जनसेवा भवनमा १५ सेप्टेम्बर, २०२६ देखि आधिकारिक रूपमा कामकाज शुरू हुने जानकारी दिए। यहाँ ग्रामीण विकास विभाग, स्वास्थ्य तथा परिवार कल्याण विभाग, शिक्षा विभाग, जलस्रोत विभाग, सिक्किम लोक सेवा आयोग तथा निगम विभागलगायत प्रमुख सरकारी विभागका कार्यालयहरू सञ्चालन हुनेछन्।
मुख्यमन्त्रीले यस सुविधाबाट विशेषगरी टाढाका जिल्लाबाट आउने जनतालाई ठूलो राहत पुग्ने बताए। विभिन्न सरकारी कामका लागि जनतालाई पटक-पटक गान्तोकसम्म आउनुपर्ने बाध्यता हट्नेछ। यसबाट उनीहरूको यात्रा खर्च र समय दुवै बचत हुने तथा सरकारी कार्यालयमा पर्खिनुपर्ने समयसमेत कम हुने उनले बताए।
उनले जनमुखी शासन व्यवस्थाको वास्तविक अर्थ सरकारलाई जनताको नजिक पुर्याउनु रहेको बताए। जनताले सरकारी सेवा लिन लामो दूरी तय गर्नुपर्ने अवस्था हुनुको सट्टा सरकार नै जनताको नजिक पुग्नुपर्ने उनको भनाइ थियो।
मुख्यमन्त्रीले आफ्नो सरकारले कार्यभार सम्हालेदेखि नै सिक्किमको पूर्वाधारलाई सुदृढ बनाउन निरन्तर काम गर्दै आएको बताए। सडक तथा पुलदेखि स्वास्थ्य, शिक्षा, प्रशासनिक पूर्वाधार र सार्वजनिक सुविधासम्म विकासका प्रत्येक पहल नागरिकको सुविधा, सम्मान र सहजतालाई केन्द्रमा राखेर अघि बढाइएको उनले बताए।
उनले जनसेवा भवनलाई आधुनिक, सहज पहुँचयुक्त र प्रभावकारी प्रशासनिक केन्द्रका रूपमा विकास गरिएको बताए। यसले शासन व्यवस्थालाई अझ विकेन्द्रीकृत बनाउनका साथै सरकारी सेवालाई थप उत्तरदायी र नागरिकमैत्री बनाउन सहयोग पुर्याउने उनको विश्वास छ।
मुख्यमन्त्रीले जनसेवा भवनमा खटिने अधिकारी तथा कर्मचारीहरूले यस नयाँ सुविधासँग जोडिएको जिम्मेवारीलाई बुझेर अझ समर्पण, दक्षता, संवेदनशीलता र नयाँ जनसेवा भावनाका साथ आफ्नो दायित्व निर्वाह गर्ने विश्वास व्यक्त गरेका छन्।
हिन्दुस्थान समाचार / बिशाल
