नाम्ची, १६ सेप्टेम्बर (हि.स.)। नाम्ची जिल्ला अस्पतालको अर्थोपेडिक विभागले एडभान्स्ड स्पाइनल सर्जरी सफलतापूर्वक सम्पन्न गरेको छ। यस उपलब्धिसँगै जिल्लास्तरमा विशेषज्ञ शल्यक्रिया सेवा विस्तार गर्ने दिशामा अस्पतालले अर्को महत्वपूर्ण उपलब्धि हासिल गरेको छ।
आईपीआर विभाग नाम्ची जिल्लाका अनुसार, २३ वर्षीया महिला बिरामीमा एल४-एल५ तहमा प्रोल्याप्स्ड इन्टरवर्टेब्रल डिस्क (मेरुदण्डको डिस्क बाहिर निस्कने समस्या) तथा एल५-एस१ तहमा डिस्क हर्निएशन भएको थियो। यसका कारण खुट्टा झुन्डिने समस्या तथा खुट्टाको ठूलो औँला उठाउने मांसपेशीको शक्ति शून्य अर्थात् ०/५ रहेको जस्ता गम्भीर स्नायुसम्बन्धी समस्या देखिएको थियो।
बिरामीमा एल५-एस१ तहमा ट्रान्सफोरामिनल लम्बर इन्टरबडी फ्युजन (टीएलआईएफ) शल्यक्रिया सफलतापूर्वक गरिएको अस्पतालले जनाएको छ। यस सफल शल्यक्रियाले नाम्ची जिल्ला अस्पतालमा जटिल अस्थि तथा मेरुदण्डसम्बन्धी उपचार स्थानीयस्तरमै उपलब्ध गराउने क्षमता बढ्दै गएको देखाएको छ। यसबाट बिरामीलाई जिल्लाबाहिरका उच्चस्तरीय अस्पतालमा उपचारका लागि पठाउनुपर्ने आवश्यकता समेत कम हुने अपेक्षा गरिएको छ।
यस उपलब्धिबारे जानकारी दिँदै नाम्ची जिल्ला अस्पतालकी जोइन्ट रिप्लेसमेन्ट, आर्थ्रोस्कोपिक एवं स्पाइन सर्जन डा. कञ्चन गुरुङले अस्पतालमा हालसम्म १ हजारभन्दा बढी जोइन्ट रिप्लेसमेन्ट तथा आर्थ्रोस्कोपिक सर्जरी सफलतापूर्वक गरिसकिएको बताइन्। उनका अनुसार, विभागले अब मिनिमल्ली इन्भेसिभ (कम चीरफार गरिने) मेरुदण्डको शल्यक्रिया (एमआईएस) र भविष्यमा रोबोट-सहायता प्राप्त शल्यक्रियातर्फ अर्को पाइला अघि बढाइरहेको छ।
यो उपलब्धिले नाम्ची जिल्लामा विशेषज्ञ स्वास्थ्य सेवाको विस्तारमा महत्वपूर्ण प्रगति भएको छ। साथै, जटिल शल्यक्रिया सेवा बिरामीको नजिकै उपलब्ध गराउँदै नाम्ची जिल्ला अस्पताललाई उन्नत अस्थि तथा मेरुदण्ड शल्यक्रियाको केन्द्रका रूपमा थप सुदृढ बनाउन योगदान पुगेको बताइएको छ।
हिन्दुस्थान समाचार / बिशाल
