उज्जैन, १८ सेप्टेम्बर (हि.स.)। भारतीय जनता पार्टीका राष्ट्रिय अध्यक्ष नितिन नवीन शुक्रबार बिहान करिब ४ बजी मध्य प्रदेशको उज्जैनस्थित विश्वप्रसिद्ध श्री महाकालेश्वर मन्दिर पुगे। उनले बाबा महाकालको प्रातःकालीन भस्म आरतीमा सहभागी भई दर्शन तथा पूजाअर्चना गरे। उनीसँग मध्य प्रदेश भाजपा अध्यक्ष हेमन्त खण्डेलवाल र उज्जैन-आलोटका सांसद अनिल फिरोजिया पनि उपस्थित थिए।

भस्म आरतीका क्रममा नितिन नवीन नन्दी हलमा बसेर हात जोड्दै बाबा महाकालको आराधना गरिरहेका देखिए। उनी करिब डेढ घण्टासम्म आरतीमा सहभागी भए। आरतीका क्रममा मन्दिर परिसर बाबा महाकालको जयजयकारले गुञ्जायमान बनेको थियो। नितिन नवीन परम्परागत सोला पोसाकमा आरतीमा सहभागी भएका थिए। उनले पहेँलो धोती लगाएका थिए। मन्दिरको परम्पराअनुसार भस्म आरतीमा सहभागी हुँदा निर्धारित परम्परागत पोसाक धारण गर्नुपर्ने व्यवस्था छ।

उनले बाबा महाकालको दिव्य स्वरूपको दर्शन गरी पूजाअर्चना गरेपछि आशीर्वाद लिए। त्यसपछि चाँदीको देहरीबाट बाबा महाकालको पूजा गर्नुका साथै जलाभिषेक पनि गरे।

देशवासीको कल्याणको कामना

दर्शनपछि सञ्चारकर्मीसँग कुरा गर्दै नितिन नवीनले बाबा महाकालको पवित्र नगरीमा आएर दर्शन तथा भस्म आरतीमा सहभागी हुने अवसर प्राप्त भएको बताए। उनले भगवान महाकालसँग देशवासीको सुख-समृद्धि, शान्ति र कल्याणको कामना गरेको बताए।

उनले आफू पहिलोपटक मध्य प्रदेश र उज्जैन आएको उल्लेख गर्दै महाकालको नगरीमा आउने प्रत्येक व्यक्तिले बाबा महाकालको दर्शन तथा भस्म आरती गरेर फर्कने गरेको बताए।

एक दिनअघि शिप्रा तटमा ‘आशीर्वादको दीप’

नितिन नवीन १७ र १८ सेप्टेम्बरमा मध्य प्रदेशको भ्रमणमा छन्। बिहीबार उज्जैनमा उनले ‘सेवा सङ्कल्प अभियान’ अन्तर्गत शिप्रा नदीको तटमा आयोजित कार्यक्रममा सहभागिता जनाएका थिए। रामघाटमा ‘आशीर्वादको दीप’ प्रज्वलन गर्नुका साथै उनी शिप्रा आरती र भजनसन्ध्यामा पनि सहभागी भएका थिए। त्यसपछि उनले उज्जैनमै रात बिताएर शुक्रबार बिहान महाकाल मन्दिर पुगेर भस्म आरतीमा सहभागिता जनाएका हुन्।

मन्दिर समितिद्वारा स्वागत

भस्म आरती तथा दर्शनपछि श्री महाकालेश्वर मन्दिर व्यवस्थापन समितिका तर्फबाट भाजपा राष्ट्रिय अध्यक्ष नितिन नवीन र प्रदेश अध्यक्ष हेमन्त खण्डेलवालको स्वागत तथा सत्कार गरिएको थियो। जिल्ला अधिकारी एवं मन्दिर समिति अध्यक्ष रोशन कुमार सिंह तथा प्रशासक एवं अपर जिल्ला अधिकारी प्रथम कौशिकले दुवै नेतालाई शाल, श्रीफल र बाबा महाकालको प्रसाद प्रदान गरे।

भस्म आरतीमा बाबा महाकालको विशेष शृङ्गार

शुक्रबार बिहान करिब ४ बजी मन्दिरका ढोका खुलेपछि भगवान महाकालको विशेष शृङ्गार गरिएको थियो। सर्वप्रथम पञ्चामृत अभिषेक तथा पूजाअर्चना गरिएको थियो। त्यसपछि दूध, दही, घिउ, मह र फलफूलको रसबाट तयार गरिएको पञ्चामृतले अभिषेक गरी बाबा महाकाललाई भाङ, चन्दन तथा आभूषणले शृङ्गार गरिएको थियो। त्यसपछि महा निर्वाणी अखाडाका तर्फबाट भगवान महाकाललाई भस्म अर्पण गरिएको थियो।

भस्म आरतीपछि बाबा महाकाललाई रजत मुकुट, मुण्डमाला, रुद्राक्षको माला तथा पुष्पमालाले सजाइएको थियो। ठूलो सङ्ख्यामा श्रद्धालुले भस्म आरतीको दर्शन गर्नुका साथै नन्दी महाराजको दर्शन गरी आफ्ना मनोकामना पूरा होऊन् भन्ने प्रार्थना गरेका थिए। यस क्रममा मन्दिर परिसर लगातार बाबा महाकालको जयजयकारले गुञ्जिरहेको थियो।

हिन्दुस्थान समाचार / भवानी थामी