गान्तोक, १८ सेप्टेम्बर (हि.स.) सिक्किमका राज्यपाल ओमप्रकाश माथुरले मुख्यमन्त्री प्रेमसिंह तामाङ तथा स्वास्थ्य एवं परिवार कल्याणका मन्त्री जीटी ढुङ्गेलको उपस्थितिमा आज सोच्यागाङस्थित हेलेन लेप्चा सरकारी चिकित्सा महाविद्यालयमा स्वतन्त्रता सेनानी हेलेन लेप्चाको अर्धकदको प्रतिमा तथा महाविद्यालयको लोगो अनावरण गरे।
हेलेन लेप्चा सरकारी चिकित्सा महाविद्यालयको उद्घाटन प्रधानमन्त्री नरेन्द्र मोदीले २८ अप्रेल, २०२६ मा भर्चुअल माध्यमबाट गरेका थिए। यो महाविद्यालय सिक्किम राज्यको पहिलो सरकारी चिकित्सा महाविद्यालय हो।
महाविद्यालय परिसरमा मुख्य शैक्षिक भवनसहित स्नातक तहका विद्यार्थीका लागि छात्रावास, इन्टर्न तथा स्नातकोत्तर विद्यार्थीका लागि छात्रावास, छात्राहरूका लागि छुट्टाछुट्टै छात्रावास, नर्सहरूको छात्रावास, नर्सिङ सुपरिटेन्डेन्टको आवास, गैरशिक्षण कर्मचारी तथा शिक्षण कर्मचारीका आवास, आवासीय चिकित्सकको छात्रावास तथा प्रधानाचार्य र उपप्रधानाचार्यका लागि आवासीय सुविधा निर्माण गरिएको छ।
परिसरमा बास्केटबल मैदान, भलिबल मैदान, व्यायामशाला तथा इन्डोर ब्याडमिन्टन कोर्टजस्ता खेलकुद तथा मनोरञ्जनका सुविधासमेत रहेका छन्। यसका साथै भूमिगत जलाशय तथा पम्प कक्ष, विद्युत् उपकेन्द्र, डिजेल जेनेरेटर, फोहोरपानी प्रशोधन केन्द्र र बाल हेरचाह केन्द्रजस्ता आवश्यक पूर्वाधारको व्यवस्था गरिएको छ।
महाविद्यालय परिसरमा आन्तरिक सवारीसाधन मार्ग, पैदलमार्ग, हरियाली क्षेत्र तथा पानी निकास र जलप्रवाहका संरचनासहित विभिन्न भवन तथा सुविधालाई जोड्ने पहुँचमार्ग निर्माण गरिएको छ।
उल्लेखनीय छ, १९०२ मा नाम्ची जिल्लाको सोङबोङ, आसाङथाङमा जन्मिएकी हेलेन लेप्चा १९८० सम्म जीवित रहिन्। उनी भारतको स्वतन्त्रता सङ्ग्राममा सक्रिय रूपमा सहभागी भएकी थिइन्। उनले असहयोग आन्दोलन तथा भारत छोडो आन्दोलनमा सक्रिय सहभागिता जनाएकी थिइन्। स्वतन्त्रता सङ्ग्राममा पुर्याएको योगदानको सम्मानस्वरूप भारत सरकारले उनलाई १९७२ मा ताम्रपत्रबाट सम्मान गरेको थियो।
महाविद्यालयको लोगोले चिकित्सा विज्ञान, शिक्षा तथा मानव सेवाको भावनालाई सिक्किमको हिमाली विरासतसँग जोडेर प्रस्तुत गरेको छ। लोगोमा ‘उपचार गर्न सिक्न, मानवताको सेवा गर्न’ भन्ने मूल आदर्श वाक्य समावेश गरिएको छ।
समारोहमा मन्त्रिपरिषद्का सदस्यहरू, सल्लाहकारहरू, विधायकहरू, गान्तोक नगर निगमका मेयर, उपमेयर र नगर पार्षदहरू, मुख्य सचिव, पुलिस महानिर्देशक, विभिन्न विभागका सचिव तथा विभागीय प्रमुखहरू, वरिष्ठ अधिकारीहरू, कर्मचारीहरू तथा अन्य विशिष्ट व्यक्तिहरूको उपस्थिति रहेको थियो।
हिन्दुस्थान समाचार / बिशाल
