नयाँ दिल्ली, २९ सेप्टेम्बर (हि.स.)। केन्द्र सरकारले २ देखि ३१ अक्टोबरसम्म विशेष अभियान–६.० सञ्चालन गर्ने भएको छ। यस अन्तर्गत राष्ट्रिय राजमार्ग र टोल प्लाजाको सरसफाइ, मर्मत, सड़कलाई खाल्डाखुल्डीरहित बनाउने, शौचालयको उन्नयन, प्रकाश व्यवस्था सुधार तथा सड़क संकेतकमा सुधारमा विशेष ध्यान दिइनेछ। अभियानको उद्देश्य राष्ट्रिय राजमार्गलाई थप सफा, सुरक्षित र सुविधाजनक बनाउनु हो।

केन्द्रिय सड़क परिवहन तथा राजमार्ग मन्त्रालय अनुसार, अभियानका क्रममा विशेषगरी शहरी क्षेत्र भएर जाने राष्ट्रिय राजमार्गबाट फोहोर हटाइनेछ। टोल प्लाजाका शौचालयको नवीकरण तथा नियमित मर्मत गरिनेछ। साथै टोल प्लाजामा सरसफाइ, रंगरोगन, राम्रो प्रकाश व्यवस्था र सौर्य ऊर्जा सुविधालाई बढ़ावा दिन जोड दिइनेछ।

मन्त्रालय अनुसार, सड़क संकेतकमा सुधार, सड़क रेखांकनको दृश्यता बढ़ाउने तथा राष्ट्रिय राजमार्गलाई खाल्डाखुल्डीरहित बनाउन पनि विशेष अभियान सञ्चालन गरिनेछ। यसबाट सड़क प्रयोगकर्ताको सुविधा र सुरक्षा सुधार गर्ने प्रयास गरिनेछ।

मन्त्रालयले अभियान दुई चरणमा सञ्चालन भइरहेको जनाएको छ। १५ देखि ३० सेप्टेम्बरसम्म तयारी चरण चलिरहेको छ, जसमा लक्ष्य निर्धारण, सरसफाइ अभियानको योजना, अनुपयोगी सामग्रीको व्यवस्थापन तथा अन्य तयारी भइरहेको छ। मुख्य अभियान २ अक्टोबरदेखि शुरु हुनेछ।

अभियान अन्तर्गत प्रत्येक क्षेत्रमा ५० किलोमिटर लामो राष्ट्रिय राजमार्ग खण्ड र एक टोल प्लाजालाई विशेष सुधार कार्यका लागि छनोट गरिएको छ। मन्त्रालय मुख्यालयका अधिकारीलाई यी स्थानको निरीक्षण तथा सुधार कार्यको प्रभाव मूल्यांकन गर्ने जिम्मेवारी दिइएको छ। अधिकारीहरूले कमी–कमजोरी पहिचान गरी तिनको भू–चिह्नीकरण गर्नेछन् र सुधार कार्यको निरन्तर निगरानी गर्नेछन्।

मन्त्रालयले राष्ट्रिय राजमार्गको सरसफाइ, सुरक्षा तथा मर्मतमा सुधार सुनिश्चित गर्न क्षेत्रीय कार्यालय, कार्यक्रम कार्यान्वयन इकाइ, परियोजना निदेशक तथा अन्य मैदानी कार्यालयलाई विशेष निर्देश दिएको छ।

विशेष अभियान–६.० अन्तर्गत पेन्डिङ मामिला घटाउने, अभिलेख व्यवस्थापन सुदृढ़ गर्ने, विद्युतीय फोहोरको जिम्मेवार व्यवस्थापन तथा कार्यालयको स्थानको उचित उपयोगमा पनि ध्यान दिइनेछ। विभिन्न संगठनमा नोडल अधिकारी नियुक्त गरिएको छ, जसले अभियानको प्रगति अनुगमन गरी नियमित रिपोर्ट प्रस्तुत गर्नेछन्।

हिन्दुस्थान समाचार / भवानी थामी