गान्तोक, 15 नोभेम्बर (हि.स.)। अरुणाचल प्रदेशका मुख्यमन्त्री पेमा खाण्डुले आज दक्षिण सिक्किमको महत्वपूर्ण धार्मिक तथा पर्यटकीय गन्तव्य राबोङ्लास्थित बुद्ध पार्कको अवलोकन गरे। मुख्यमन्त्री खाण्डुको यो आधिकारिक भ्रमणले सम्पूर्ण राबोङ्ला क्षेत्रमा उत्साह, गर्व तथा सम्मानको वातावरण सृजना गरेको छ।
भ्रमणका क्रममा मुख्यमन्त्रीसँग नाम्ची जिल्लास्थित मुख्यमन्त्रीका अतिरिक्त राजनीतिक सचिव बिष्णु शर्मा, राज्य महिला आयोगकी अध्यक्ष टेनी डोमा भोटिया, बुद्ध पार्कका ओएसडी छितेन भोटिया, एडीसी (विकास) डीपी दाहाल, एसडीपीओ रोशन राई, एसडीएम सरन दास कालिकोटे, साथै एसएचओ राबोङ्ला, पर्यटन विभाग, प्रोटोकल विभागका अधिकारीहरू तथा स्थानीय जनप्रतिनिधि र गण्यमान्य व्यक्तिहरू उपस्थिति थियो।
मुख्यमन्त्री खाण्डुले बुद्ध पार्क परिसर, पद्मसम्भवको भव्य प्रतिमा, पार्कको संरचनागत विकास, पर्यटकका लागि उपलब्ध सुविधाहरू तथा स्वच्छता–व्यवस्थापन सम्बन्धी सबै पक्षहरू नजिकबाट निरीक्षण गरे। उनले यहाँको प्राकृतिक सुन्दरताको संरक्षण, धार्मिक महत्त्वको प्रवर्द्धन र पर्यटन सम्भावनालाई अझ सबल बनाउन स्थानीय समुदायले गरेको निरन्तर प्रयासप्रति उच्च प्रशंसा व्यक्त गरे।
यस उच्चस्तरीय भ्रमणले राबोङ्ला क्षेत्रको पर्यटन विकास, धार्मिक सांस्कृतिक प्रवर्द्धन र अवसंरचनात्मक उन्नतिमा नयाँ प्रेरणा मिल्ने विश्वास लिइएको छ।
हिन्दुस्थान समाचार / बिशाल
