नयाँ दिल्ली, १७ नोभेम्बर (हि.स.)। राजस्व गुप्तचर निदेशालय (डीआरआई) ले ‘अपरेशन फायरट्रेल’ अन्तर्गत ठूलो कारबाही गर्दै गुजरातको मुन्द्रा बन्दरगाहमा चीनबाट अवैध रूपमा ल्याइएका ३० हजार पटेकाका टुक्रा बरामद गरेको छ। डीआरआईका अनुसार, बिना कुनै वैध अनुमति आयात गरिएका ती पटेका करिब पाँच करोड रूपियाँ बराबरका छन्। यस प्रकरणका मुख्य योजनाकारलाई पक्राउ गरिएको छ।
डीआरआई अधिकारीहरूको भनाइअनुसार, ४० फिट लामो कन्टेनरको जाँचका क्रममा चीनबाट ल्याइएका पटेका टुक्रा लुकाएर राखिएको पाइएको थियो। विदेश व्यापार नीतिअनुसार पटेकाहरू आयात निषेधित सूचीमा पर्छन् र यसका लागि डीजीएफटी तथा पेट्रोलियम तथा विस्फोटक सुरक्षा संगठनबाट अनुमति लिनुपर्ने अनिवार्य व्यवस्था छ। तर पक्राउ परेका आयातकसँग कुनै वैध दस्तावेज थिएन र उनले तस्करीको प्रयास स्वीकार गरेका छन्। यसै वर्ष अक्टोबरमा पनि डीआरआईले मुम्बई र तूतीकोरिनमा चीनी पटेकाहरूको अवैध खेप बरामद गरी तस्करीका प्रयासहरू असफल बनाएको थियो। एजेन्सीका अनुसार, यस्ता खतरनाक सामानहरूको अवैध आयात जनसुरक्षा, राष्ट्रिय सुरक्षाका साथै बन्दरगाहको पूर्वाधार र ढुवानी सञ्जालका लागि गम्भीर खतरा बन्न सक्छ।
---------------
हिन्दुस्थान समाचार / भवानी थामी