सोरेङ, 19 दिसम्बर (हि.स.)। सोरेङ जिल्ला प्रशासनले आज पशुपालन एवं पशु चिकित्सा सेवा विभागको संयुक्त तत्वावधानमा बिजुलीले चल्ने भुस काट्ने मेसिनहरू बितरण कार्यक्रम आयोजन गऱ्यो। 'सुशासन सप्ताह- प्रशासन गांव की ओर' को ब्यानरमा आयोजित यस कार्यक्रमको उद्देश्य सेवा प्रवाहलाई सुदृढ़ बनाउनु र प्रशासनलाई जनताको नजिक ल्याउनु रहेको थियो।
यो कार्यक्रम सुशासन सप्ताह अन्तर्गत विशेष गुनासो निवारण शिविरको एक भागको रूपमा सञ्चालन गरिएको थियो, जसको उद्देश्य सार्वजनिक गुनासोहरूलाई सम्बोधन गर्नु र एकै मञ्चमा लाभार्थीहरूलाई सोझै कल्याणकारी लाभहरू पुर्याउनु रहेको थियो।
कार्यक्रमका मुख्य अतिथि सेवानिवृत्त एडीसी सन्तोष कुमार आलेले 'प्रशासन गांव की ओर' पहलको भिजन र उद्देश्यमाथि प्रकाश पारे। उनले यस पहलको मुख्य उद्देश्य सरकारी सेवाहरू नागरिकहरूका घरदैलोसम्म पुऱ्याउनु रहेको अवगत गराए। उनले जनता, प्रशासन र सरकारबीचको अन्तरनिर्भर सम्बन्धमाथि बोल्दै प्रभावकारी र उत्तरदायी शासन सुनिश्चित गर्न सबै हितधारकहरूको साझा जिम्मेवारीमाथि जोड दिए। उनले सबै अधिकारीहरूलाई आफ्नो कर्तव्य सरलता, इमानदारी र प्रतिबद्धताका साथ पूरा गर्न आग्रह गरे।
यसैगरी, अतिरिक्त जिल्लापाल डीआर बिष्टले यस पहलको समग्र उद्देश्य र महत्वको बारेमा प्रकाश पारे। उनले 'प्रशासन गांव की ओर' ले प्रत्येक घरपरिवारमा पुगेर समयमै र पारदर्शी रूपमा नागरिकहरूका चिन्ताहरूलाई सम्बोधन गर्ने र समावेशी शासन सुनिश्चित गर्ने लक्ष्य राखेको बताए। उनले जनताको विश्वासलाई सुदृढ़ पार्न र तल्लो तहमा शासनको प्रभावकारिता बढाउन यस्ता शिविरहरूको महत्त्वलाई जोड दिए।
कार्यक्रममा पशुपालन एवं पशु चिकित्सा सेवा विभागका अतिरिक्त निर्देशक डा. किशोर थापाले कृषकहरूलाई बितरण गरिएको बिजुलीले चल्ने भुस काट्ने मेसिनबारे जानकारी गराएका थिए। कृषकहरूलाई विशेष गुनासो निवारण शिविर अन्तर्गत सीओआई, आय प्रमाणपत्र, पर्चा, सेल डीड आदि प्रमाणपत्रहरू पनि बितरण गरिएको थियो।
हिन्दुस्थान समाचार / बिशाल
