सिलगढ़ी, २५ दिसम्बर (हि.स.)।
एकातर्फ क्रिसमस र नयाँ वर्षको स्वागतको तयारी तीव्र छ भने अर्कोतर्फ सिलीगढ़ु शहरमा अधिकांश पब र बार राति तीन बजीसम्म खुला राख्ने निर्णयले पुलिसको चिन्ता बढाएको छ। पर्व–उत्सवको आडमा शहरमा ब्राउन सुगर र कोकिनजस्ता लागूऔषधको कारोबार तीव्र रूपमा फैलिँदै गएको छ, जसप्रति पुलिसको कडा निगरानी रहेको छ।
पुलिस स्रोतका अनुसार, लागूऔषध तस्करहरूले पक्राउबाट बच्न अनौठा कोड नेम प्रयोग गर्न थालेका छन्। ‘रक’, ‘चार्ली’, ‘एडम’, ‘ईभ’, ‘स्नो’ र ‘नोज क्यान्डी’ जस्ता नाममार्फत शहरका पब, बार र प्रभावशाली वर्गसम्म नशालु पदार्थ पुर्याइँदै आएको छ। सबैभन्दा चिन्ताजनक कुरा के छ भने नेपाल, मिजोरम र असम हुँदै यो नशा सिधै सिलगढ़ीका जेन–जेड युवासम्म पुगिरहेको छ।
स्रोतहरूको दाबीअनुसार, चम्पासारी मोड र बंगाल सफारी क्षेत्र हुँदै सेवक रोड नजिकको एक निश्चित स्थानमा लागूऔषधको डेलिभरी गरिन्छ। यस सम्पूर्ण नेटवर्क पछाडि एउटा अनौठो सप्लाइ चेन सक्रिय छ, जहाँ आफूलाई ‘समाजसेवी’ बताउने केही युवकहरू वास्तवमा ड्रग माफियाका क्यारियरका रूपमा काम गरिरहेका छन्। तीमध्ये एक सेवक रोड क्षेत्रका बासिन्दा हुन् भने अर्काे अन्य राज्यबाट आएर सिलगढ़ीमा बसोबास गरिरहेका छन्। एजेन्टहरूमार्फत यी लागूऔषध शहरका नामी पबहरूमा नियमित रूपमा पुर्याइन्छ।
आरोप छ, सेवक रोडका दुई पबमा यो कारोबार सबैभन्दा बढी फस्टाएको छ। त्यहाँ लागूऔषध सेवनका लागि विशेष गरी साना–साना गोप्य केबिन वा कक्ष बुक गर्ने सुविधा छ, जहाँ साथीभाइ वा नजिकका व्यक्तिसँग समय बिताउने बहानामा नशा गरिन्छ। हालै सेवक रोडका एक पब मालिक लागूऔषध सेवन गरिरहेको कथित भिडियो सामाजिक सञ्जालमा भाइरल भएपछि हंगामा मच्चिएको थियो। भिडियोमा पब मालिक आफ्नै पबभित्र युवाहरूसँग नोटमा बेरिएको ब्राउन सुगर सुँघिरहेको देखिन्छ, जबकि वरिपरिका मानिसहरू उसलाई उक्साइरहेको देखिन्छ। यद्यपि हिन्दुस्थान समाचारले उक्त भिडियोको सत्यता पुष्टि गर्दैन। यो भिडियो सिलगढ़ी पुलिससम्म पुगे पनि अहिलेसम्म कसैविरुद्ध ठोस कारबाही भएको छैन।
पब–बार मात्र होइन, कोड नेममार्फत शहरका कुनै पनि पार्टी वा मनपर्ने स्थानमा लागूऔषध सजिलै उपलब्ध भइरहेको छ। उता, राति तीन बजीसम्म पब खुला रहँदा सडक दुर्घटनाको जोखिम पनि धेरै गुणा बढेको छ। गत वर्ष ३१ दिसम्बरको राति सेवक रोडसहित विभिन्न क्षेत्रमा गम्भीर सडक दुर्घटना र सवारी पल्टिने घटनाहरू भएका थिए।
यी आशंकालाई ध्यानमा राख्दै बिहारी सेवा समिति जस्ता संगठनहरूले राति १० बजीसम्म पब बन्द गर्न माग गर्दै पुलिस कमिश्नरलाई पत्र दिएका छन्। अधिवक्ता मनिष बारीका अनुसार, वर्षको अन्तिम सातामा ट्राफिक निगरानी कमजोर हुने भएकाले अनियन्त्रित मद्यपान बढ्छ, त्यसैले प्रशासनले कडा कदम चाल्नुपर्छ।
यसैबीच, डीसीपी (ट्राफिक) काजी शमसुद्दीन अहमदले ट्राफिक नियन्त्रणका लागि १० वटा विशेष आउटपोस्ट स्थापना गरिने र कडा निगरानी राखिने जानकारी दिएका छन्।
उता, विधायक शंकर घोषले लागूऔषध कारोबारमा प्रशासनिक मिलेमतोको आरोप लगाउँदै पुलिस कमिश्नरसँग उजुरी गर्ने बताएका छन्। उप–मेयर रञ्जन सरकारले ड्रग कारोबारसम्बन्धी समाचारलाई ‘भ्रामक दुष्प्रचार’ बताएका छन्।
---------------
हिन्दुस्थान समाचार / भवानी थामी
