कोलकाता, 2 अप्रेल (हि.स.)। कोलकाताको मुकुन्दपुर क्षेत्रमा एक वृद्ध दम्पतिको संदिग्ध परिस्थितिमा मृत्यु भएको मामिला प्रकाशमा आएको छ। बुधवार बिहान पूर्व जादवपुर थाना क्षेत्रस्थित एउटा घरबाट पति-पत्नीको शव उद्धार गरियो। प्रारम्भिक जाँचमा मामिला आत्महत्या रहेको बताइए पनि धेरैवटा प्रशअनहरू उठिरहेका छन्। मृतक दम्पतिकी छोरीले आफ्ना दाज्यु-भाउज्युमाथि हत्याको आरोप लगाएकी छन् जसबाट मामिला झन् गाँठो परेको छ।
दम्पतिको पहिचान 65 वर्षीय दुलाल पाल र 58 वर्षीय रेखा पालको रूपमा भएको छ। पुलिस अनुसार दुलालको शव घरको डाइनिंग रूममा गलफन्दामा झुण्डिरहेको भेटियो भने उनकी पत्नी रेखाको शव बेडरूममा झुण्डिरहेको थियो। घटनास्थलबाट एउटा सुसाइड नोट पनि फेला परेको छ। परिवारकी विवाहिता छोरीले आफ्ना माता-पितालाई फोन गरेकी थिइन्। फोनको जवाफ नआएपछि तिनले छिमेकीहरूलाई घरमा गएर हेरिदिने आग्रह गरेकी थिइन्। त्यसपछि यस्तो आश्चर्यचकित घटना सामु आयो।
दम्पति आफ्ना छोरा-बुहारीसित यस घरमा बस्दै आएका थिए। छोरीको आरोप छ, माता-पिताको हत्या उसको दाज्यु सौरभ पाल र भाउज्यु कल्याणी मण्डलले गरेका हुन्। सौरभ पेशाले फिजियोथेरपिस्ट हुन् भने पत्नी एक निजी कम्पनीमा कार्यरत छन्। छोरीले दाबी गरिन्, गए मंगलवार राती पनि उनीहरूले माता-पितामाथि कुटपिट गरेका थिए। छिमेकीहरूले घरमा झगड़ा भएको आवाज सुनेका थिए।
मामिलाको जाँच गरिरहेको पुलिस समक्ष धेरैवटा प्रश्नहरू तेर्सिएका छन्। यदि यो आत्महत्या थियो भने शव भिन्न-भिन्नै कोठामा किन थियो? के पहिला नै कसैले हत्या गरेर पछि यसलाई आत्महत्याको रूप दिने चेष्टा गरियो? यी सबै पक्षहरूको जाँच पुलिसले गरिरहेको छ।
हाल पुलिसले शवहरूलाई पोस्टमर्टम गर्न पठाइदिएको छ। अर्कोतिर घटनापछि छोरा-बुहारी दुवै बेपत्ता भएका छन्। पोस्टमर्टम रिपोर्ट आएपछि मात्र स्पष्ट हुनेछ कि यो आत्महत्या हो वा सुनियोजित हत्या।
हिन्दुस्थान समाचार / उष्णता छेत्री शर्मा