गान्तोक, 31 अगस्त (हि.स.)। तीन दिवसीय राष्ट्रिय खेल दिवस 2025 समारोह आज 'सन्डे अन् साइकल' कार्यक्रमका साथ सम्पन्न भयो। राजधानीको व्हाइट हल परिसरमा आयोजित कार्यक्रममा राज्य खेलकुद विकास बोर्डका अध्यक्ष रिन्जिङ डब्ल्यु छोपेल मुख्य अतिथि थिए। कार्यक्रमको आयोजना राज्य खेलकुद एवं युवा मामिला विभागले गरेको थियो।
मुख्य अतिथि अध्यक्ष छोपेलले खेलकुदको वास्तविक सार केवल पदक र प्रशंसाको खोजीमा मात्र नभई चरित्र, अनुशासन र एकतालाई आकार दिने यसको स्थायी क्षमतामा निहित रहेको बताए। उनले खेलकुदलाई जीवनशैलीको रूपमा अपनाउनु पर्छ जसले स्वस्थ, थप लचिलो र सामंजस्यपूर्ण समुदायहरूको विकास होस् भनी बताए।
यस अघि खेलकुद एवं युवा मामिला विभागकी सचिव याङ्छेन डी. तामाङले उपस्थित सबैलाई शुभकामना दिँदै साइक्लिङ फिटनेस र दिगोपन प्रवर्द्धन गर्ने सबैभन्दा सरल तर प्रभावकारी माध्यम मध्ये एक रहेको बताइन्।
कार्यक्रममा साइक्लिङ एसोसिएशन अफ् सिक्किमका अध्यक्ष टाशी छोपेल विशिष्ट अतिथि थिए। साथै, विभागका मुख्य अभियन्ता मिलन प्रधान, अतिरिक्त निदेशक डा. आरबी विश्वकर्म आदि उपस्थित थिए।
हिन्दुस्थान समाचार / बिशाल
31 Aug 2025
