गान्तोक, 31 अगस्त (हि.स.)। सिक्किम क्रान्तिकारी मोर्चा पार्टीको नाम्ची जिल्लास्तरीय समन्वय बैठक आज नाम्ची बजारस्थित जिल्ला पार्टी कार्यालयमा सम्पन्न भयो। बैठकको आयोजन पार्टीका विभिन्न एकाइहरू र अग्रणी संगठनहरूबीच अझ बढी समन्वय प्रवर्द्धन गर्दै तृणमूल तहमा पार्टीलाई बलियो बनाउने उद्देश्यका साथ गरिएको आज जारी प्रेस विज्ञप्तिमा उल्लेख छ।
बैठकमा पार्टीको सुचारु सञ्चालन, पदाधिकारीहरूले अपनाउनु पर्ने कार्य संयन्त्र, जिल्ला तथा निर्वाचन क्षेत्रस्तरीय समितिहरूको वर्तमान स्थिति र भविष्यको लागि रणनीतिक कार्ययोजना निर्माणमाथि छलफल भयो। बैठकमा नाम्ची जिल्ला अन्तर्गत सात निर्वाचन क्षेत्रका विधायकगण लगायत पार्टीका वरिष्ठ नेतृत्वगण उपस्थित थिए।
बैठकले पार्टी संयन्त्रको निर्बाध सञ्चालन सुनिश्चित गर्न विभिन्न संगठनात्मक स्तरहरूबीच सामूहिक जिम्मेवारी, समन्वय र प्रभावकारी सञ्चारको महत्त्वलाई जोड दियो। अन्तरक्रियाले तृणमूल स्तरका गतिविधिहरूको गहन समीक्षा र जिल्लाको हरेक कुनामा पार्टीको उपस्थितिलाई सुदृढ पार्ने उद्देश्यले रणनीतिहरू बनाउन मञ्च प्रदान गरेको बताइएको छ।
जिल्ला स्तरीय समन्वय बैठक पार्टीको संगठनात्मक ढाँचालाई सुदृढ पार्न, जनसम्पर्क बढाउन र जनकेन्द्रित नीतिहरूलाई तल्लो तहसम्म प्रभावकारी रूपमा कार्यान्वयन गर्न एकताबद्ध भएर काम गर्ने प्रतिबद्धताका साथ सम्पन्न भएको प्रेस विज्ञप्तिमा उल्लेख छ।
हिन्दुस्थान समाचार / बिशाल
31 Aug 2025
