नयाँ दिल्ली, १४ जनवरी (हि.स.)। प्रधानमन्त्री नरेन्द्र मोदीले आज देशवासीहरूलाई मकर संक्रान्तिको हार्दिक शुभकामना व्यक्त गरेका छन्। आज देशभरका पवित्र सरोवर, कुवा तथा नदीहरूमा स्नान गर्न भक्तजनहरूको ठूलो भीड देखिएको छ। भगवान् रामको तपोभूमि चित्रकूटका धार्मिक स्थलहरूमा पनि मकर संक्रान्तिको पूजा अघि स्नान गर्ने श्रद्धालुहरूको घुइँचो लागेको छ।

प्रधानमन्त्री नरेन्द्र मोदीले आज बिहान ह्वाट्सएपमार्फत सन्देश दिँदै लेखे, “सबै देशवासीलाई मकर संक्रान्तिको हार्दिक शुभकामना। तिल र गुडको मिठासले भरिएको भारतीय संस्कृति र परम्पराको यो पावन अवसरले सबैको जीवनमा खुशी, समृद्धि र सफलताको कामना गर्दछ। सूर्यदेवले सबैको कल्याण गरून्।”

मकर संक्रान्तिको अवसरमा चित्रकूटको भरतकूपमा पाँचदिने मेलाको शुभारम्भ भएको छ। चित्रकूटको रामघाटमा बिहानदेखि नै स्नानार्थीहरूको भीड जम्मा भएको छ। भरतकूपमा पाँच तीर्थको पवित्र जलले स्नान गर्नुको विशेष धार्मिक मान्यता छ। रामचरितमानसको अयोध्याकाण्डको चौपाई, 'भरतकूप अब कहिहहिं लोगा, अतिपावन तीरथ जल योगा। प्रेम सनेम निमज्जत प्राणी, होईहहिं विमल कर्म मन वाणी।।'ले भरतकूपको महात्मको बोध गराउॅंछ।

चित्रकूट भगवान् श्रीरामको वनवासकालीन तपोभूमि हो। त्यही समयमा भरत अयोध्याका जनतासहित दाजु श्रीरामलाई मनाउन यहाँ आएका थिए। साथमा राज्याभिषेकका लागि सबै तीर्थहरूको जल पनि ल्याइएको थियो। भगवान् श्रीरामले १४ वर्षको वनवासका लागि दृढ संकल्पिक थिए।

अयोध्या फर्किन र राज्याभिषेक स्वीकार गर्न अस्वीकार गरेपछि भरत निराश भए र श्रीरामको आदेशअनुसार सबै तीर्थहरूको जल र सामग्री उक्त कूपमा अर्पण गरे। त्यसयता यस कूपको नाम भरतकूप रहन गयो।

मकर संक्रान्तिको अवसरमा मन्दाकिनी तटको रामघाट, सूर्यकुण्ड, भरतकूप, वाल्मीकि आश्रम लालापुर, साईपुर, पालेश्वरनाथ पहाडी, मन्दाकिनी–यमुना संगम स्थल कनकोटा, तुलसी जन्मस्थली राजापुर, परानू बाबा बरगढ़, शबरी जलप्रपात तथा मार्कण्डेय आश्रममा स्नान गर्न श्रद्धालुहरूको भीड लागेको छ।

हिन्दुस्थान समाचार / भवानी थामी