नयाँ दिल्ली, २१ अक्टोबर (हि.स.)। राजधानी दिल्लीमा प्रदूषणको स्तर बढ्दै गएपछि र ग्रेडेड रेस्पोन्स एक्सन प्लान (ग्रैप-१) लागू भएपछि दिल्ली मेट्रो रेल कर्पोरेसन (डीएमआरसी) ले २२ अक्टोबरदेखि कार्यदिवसमा आफ्नो नेटवर्कमा २० वटा अतिरिक्त मेट्रो फेरा सञ्चालन गर्ने निर्णय गरेको छ। निजी सवारीसाधनको सट्टा सार्वजनिक यातायातको अधिकतम प्रयोग गर्न मानिसहरूलाई प्रोत्साहित गर्नु यसको उद्देश्य रहेको छ। बिहीबार जारी विज्ञप्तिमार्फत यसबारे जानकारी दिइएको हो।

विज्ञप्तिअनुसार, डीएमआरसीले आफ्ना सबै निर्माणस्थल तथा आसपासका सडकहरूमा प्रदूषण नियन्त्रण अभियानसमेत तीव्र पारेको छ। यसअन्तर्गत निर्माणस्थलभित्र धुलोको मात्रा कम गरिनेछ भने आसपासका सडकबाट धुलो र फुटपाथबाट फोहोर हटाइनेछ। सबै निर्माण सामग्रीलाई उचित तरिकाले छोपेर राखिनेछ तथा सवारीसाधनका लागि उपलब्ध ह्विल वास सुविधाको जाँच गरिनेछ। डीएमआरसीका इन्जिनियरहरूले स्वयं निर्माणस्थलहरूको निरीक्षण गर्नेछन्।

मेट्रो निर्माणका कारण दिल्लीका करिब ३१ किलोमिटर सडक अस्थायी रूपमा डीएमआरसीको अधीनमा छन्। डीएमआरसीका अनुसार, प्रदूषण बढ्न नदिन यीमध्ये अधिकांश सडकको मर्मतसम्भार गरिसकिएको छ।

डीएमआरसीले आफ्ना निर्माणस्थल, मेट्रो स्टेसन तथा कार्यालय भवनहरूमा २५० भन्दा बढी एन्टी-स्मग गन र मिस्ट गन जडान गरेको पनि जनाएको छ।

हिन्दुस्थान समाचार / भवानी थामी