नयाँ दिल्ली, २१ अक्टोबर (हि.स.)। दिल्लीका पर्यावरण मन्त्री मनजिन्दर सिंह सिरसाले कांग्रेस नेता तथा लोकसभामा विपक्षी दलका नेता राहुल गान्धीमाथि देशलाई अस्थिर बनाउने, समाजमा तनाव सिर्जना गर्ने र मानिसहरूलाई उक्साउने राजनीति गरेको आरोप लगाएका छन्। उनले राहुल गान्धी र कांग्रेस पार्टीले बारम्बार देशका संवैधानिक संस्थाहरूलाई बदनाम गर्ने प्रयास गरिरहेको बताए। आगामी १ नोभेम्बरदेखि कांग्रेसले प्रस्तावित गरेको धरना तथा प्रदर्शनलाई लिएर पनि उनले प्रश्न उठाउँदै राजनीतिक लाभका लागि देशमा भ्रम र अस्थिरताको वातावरण सिर्जना गर्न खोजिएको आरोप लगाए।

सिरसाले कांग्रेस र राहुल गान्धीले गरिरहेको राजनीति देशका लागि चिन्ताजनक रहेको बताए। सत्ता प्राप्तिका लागि कांग्रेस नेतृत्वले विगतमा अपनाएको राजनीतिक बाटोमै राहुल गान्धी पनि अघि बढिरहेको देखिएको उनले आरोप लगाए। कांग्रेसमाथि तीव्र प्रहार गर्दै सिरसाले धरना तथा प्रदर्शनका लागि राहुल गान्धीले फेरि १ नोभेम्बरकै मिति किन रोजेको भन्दै प्रश्न गरे।

सन् १९८४ को सिखविरोधी दङ्गाको उल्लेख गर्दै सिरसाले १ नोभेम्बर, १९८४ को दिन सिख समुदायका लागि कहिल्यै बिर्सन नसकिने पीडा लिएर आएको बताए। दिल्लीसहित देशका विभिन्न भागमा हजारौँ सिखको हत्या भएको र अनेकौँ परिवार उजाडिएको उनले बताए। सन् १९८४ का पीडित परिवारहरूको घाउ अझै ताजा रहेको र उनीहरू न्यायको प्रतीक्षामा रहेको उनको भनाइ थियो।

सिरसाले सन् १९८४ का घटनामा कांग्रेसका कैयौँ नेताहरूको भूमिकालाई लिएर आरोप, अनुसन्धान तथा कानुनी मुद्दाहरू लामो समयदेखि सार्वजनिक बहसको विषय रहँदै आएको बताए। उनले जगदीश टाइटलर, सज्जन कुमार र कमलनाथसँग सम्बन्धित मामिलाहरूको पनि उल्लेख गरे। आज राहुल गान्धीले गरिरहेको राजनीतिबाट देशमा अस्थिरता र अराजकताको वातावरण सिर्जना गर्न खोजिएको जस्तो देखिने उनले आरोप लगाए। जनतालाई उक्साउने र समाजलाई विभाजित गर्ने राजनीति देशले स्वीकार नगर्ने उनको भनाइ थियो।

सिरसाले राहुल गान्धीको विदेश भ्रमण तथा विदेशी सङ्गठन र शक्तिहरूसँगको सम्पर्कलाई लिएर पनि प्रश्न उठाए। कांग्रेसले विदेशमा कसकसलाई भेटिरहेको छ, कुन-कुन सङ्गठनसँग सम्पर्क गरिरहेको छ र ती भेटघाटको उद्देश्य के हो भन्ने विषयमा देशका जनतासामु स्पष्ट पार्नुपर्ने उनले बताए। राहुल गान्धीमाथि निशाना साध्दै उनले नक्कली ‘जेन-जी’को सहारामा आखिर कहिलेसम्म राजनीति गर्ने भन्दै प्रश्न गरे।

उनले युवाहरूलाई भ्रमित भएर गलत बाटोमा नलाग्न र कसैको राजनीतिक स्वार्थको माध्यम नबन्न आग्रह गरे। युवाहरूको ऊर्जा देशको विकास र सकारात्मक परिवर्तनमा उपयोग हुनुपर्ने उनको भनाइ थियो। देशमा अराजकता फैलाउने तथा संवैधानिक संस्थाहरूलाई बदनाम गर्ने प्रयासमा युवाहरूको ऊर्जा खर्च गर्न नहुने उनले बताए।

सिरसाले १ नोभेम्बर १९८४ को मिति सिख समुदायका लागि पात्रोको एउटा सामान्य मिति मात्र नभई हजारौँ परिवारको पीडा र त्रासदीको स्मृति भएको बताए। त्यसैले यस मितिको आसपास हुने कुनै पनि राजनीतिक गतिविधिमा विशेष संवेदनशीलता अपनाउनुपर्ने उनको भनाइ थियो।

सन् १९८४ का पीडित परिवारहरूको घाउ पुनः कोट्याउने कुनै पनि राजनीतिक प्रयास स्वीकार गर्न नसकिने सिरसाले बताए। राजनीतिक मतभेदको समाधान लोकतान्त्रिक र संवैधानिक प्रक्रियामार्फत हुनुपर्ने भन्दै उनले तनाव, हिंसा वा अराजकताको बाटो अपनाउन नहुने उल्लेख गरे। १ नोभेम्बर, १९८४ मा भएको घटनाको पीडा सिख समुदायले अझै नबिर्सिएको बताउँदै उनले उक्त पीडालाई राजनीतिक स्वार्थका लागि प्रयोग गर्ने कुनै पनि प्रयासको कडा विरोध गर्ने बताए।

हिन्दुस्थान समाचार / भवानी थामी