नयाँ दिल्ली, २५ अक्टोबर (हि.स.)। लोकसभा अध्यक्ष ओम बिरलाले आइतवार रूसको स्टेट ड्यूमाका अध्यक्ष व्याचेस्लाभ वोलोदीनसँग महत्त्वपूर्ण द्विपक्षीय बैठक गरेका छन्। यस क्रममा दुवै नेताले भारत र रूसबीचको दीर्घकालीन मैत्री सम्बन्ध तथा संस्थागत संसदीय सहयोगलाई अझ् सुदृढ़ बनाउने विषयमा विस्तृत छलफल गरे।

बैठकका क्रममा लोकसभा अध्यक्ष ओम बिरलाले भारत–रूसबीचको ‘विशेष र विशेषाधिकार प्राप्त रणनीतिक साझेदारी’ सम्बन्धको उल्लेख गरे। उनले दुवै देशबीच कूटनीतिक सम्बन्ध स्थापना भएको ८० वर्ष पूरा हुनु अत्यन्त महत्त्वपूर्ण र ऐतिहासिक अवसर भएको बताए।

द्विपक्षीय सम्बन्धलाई नयाँ गति दिने उद्देश्यले लोकसभा अध्यक्षले भारत र रूसका संसद्हरूबीच अन्तरसंसदीय सङ्घको आगामी बैठक चाँड़ै आयोजना गर्न सुझाव दिए। दुवै पक्षले संसदीय स्तरमा निरन्तर र संस्थागत संवादको आवश्यकतामा सहमति जनाए।

संवाद तन्त्रलाई सुदृढ़ बनाउन दुवै नेताले संसदीय प्रतिनिधिमण्डलहरूको नियमित आदान-प्रदानमा जोड दिए। युवा तथा महिला सांसदहरूबीच आपसी संवाद र विचारविमर्शलाई प्रोत्साहन गर्ने विषयमा पनि चर्चा गरे। साथै, संसदीय मैत्री समूहहरू मार्फत दुवै देशबीचको सम्पर्कलाई अझ् प्रगाढ़ बनाउने विषयमा छलफल भयो।

ओम बिरलाले रूसी प्रतिनिधिमण्डललाई भारतीय संसद्का आधुनिक पहलहरूबारे जानकारी गराए। उनले संसदीय भाषण प्रविधि मार्फत संसदीय कार्यवाहीलाई भारतका विभिन्न भाषामा सहज रूपमा उपलब्ध गराउने प्रयास भइरहेको बताए। लोकसभा अध्यक्षले प्रविधिको प्रभावकारी प्रयोगले संसदीय कामकाजलाई अझ् सरल, पारदर्शी र जनकेन्द्रित बनाउन महत्त्वपूर्ण भूमिका खेलिरहेको उल्लेख गरे।

ओम बिरलाले ब्रिक्स सदस्य राष्ट्रहरूका संसद्हरूबीच घनिष्ठ र निरन्तर सहयोगले विश्वव्यापी चुनौतीहरूको समाधान तथा विकासशील देशहरूको साझा प्राथमिकतालाई अघि बढ़ाउन महत्त्वपूर्ण भूमिका खेल्ने बताए। दुवै देशका नेताहरूले आतङ्कवादको खतरासँग जुध्न अन्तरराष्ट्रिय सहयोग र संयुक्त प्रयासको आवश्यकता दोहोर्याए। लोकसभा अध्यक्षले यस विषयमा भारतलाई रूसले निरन्तर प्रदान गर्दै आएको समर्थनको प्रशंसा गरे।

दुवै पक्षले द्विपक्षीय व्यापार, विज्ञान तथा प्रविधि, कृषि, उद्योग र दुवै देशका जनताबीच आपसी सम्पर्क विस्तार गर्ने व्यापक सम्भावनाहरूबारे सकारात्मक छलफल गरे।

/ बिशाल