नयाँ दिल्ली, २५ अक्टोबर (हि.स.)। लोकसभा अध्यक्षको पहलमा देशका विधायिकी निकायहरूका लागि प्रक्रिया तथा कार्य सञ्चालन सम्बन्धी एकरूप आदर्श नियम तयार गर्ने उद्देश्यले गठित पीठासीन अधिकारीहरूको समितिको बैठक 27 अक्टोबरमा दिल्लीमा आयोजना गरिने भएको छ। दिल्ली विधानसभा अध्यक्ष विजेन्द्र गुप्ताले आइतवार यसबारे जानकारी दिँदै बैठकमा प्रस्तावित एकरूप आदर्श नियमसँग सम्बन्धित मस्यौदा प्रतिवेदन र त्यसमा समावेश सिफारिसहरूमाथि विचार-विमर्श गरिने बताए।

बैठक नयाँ दिल्ली स्थित सरदार पटेल मार्गको ताज होटलमा उत्तर प्रदेश विधानसभा अध्यक्ष सतीश महनाको अध्यक्षतामा आयोजना हुनेछ। समितिका सदस्य तथा दिल्ली विधानसभा अध्यक्ष विजेन्द्र गुप्ताले बैठकमा स्वागत सम्बोधन दिनेछन्। बैठकमा उत्तर प्रदेश, नागाल्यान्ड, महाराष्ट्र, हिमाचल प्रदेश, कर्नाटक र दिल्ली विधानसभाका पीठासीन अधिकारी तथा प्रतिनिधिहरू सहभागी हुनेछन्। यसमा उत्तर प्रदेश विधानसभा अध्यक्ष सतीश महना, महाराष्ट्र विधानसभा अध्यक्ष राहुल नार्वेकर, हिमाचल प्रदेश विधानसभा अध्यक्ष कुलदीप सिंह पठानिया तथा कर्नाटक विधानसभा अध्यक्ष गुरुपादगौड़ा संगनगौडा पाटिल लगायत समितिका अन्य सदस्य र सम्बन्धित विधानसभाका अधिकारीहरू सहभागी हुनेछन्।

बैठकको प्रमुख कार्यसूची प्रस्तावित एकरूप आदर्श नियमसँग सम्बन्धित मस्यौदा प्रतिवेदन र त्यसमा प्रस्तुत सिफारिसहरूमाथि विचार गर्नु रहेको छ। समितिले ती सिफारिसहरूको समीक्षा गर्दै विभिन्न विधायिकी निकायहरूमा प्रक्रिया तथा कार्य सञ्चालनका लागि साझा रूपरेखा विकास गर्ने उद्देश्यले छलफल गर्नेछ। यस क्रममा थप विचारविमर्श वा स्पष्टीकरण आवश्यक पर्ने विषयहरूमाथि पनि चर्चा हुन सक्नेछ।

विजेन्द्र गुप्ताले यो बैठकले विधायिकी संस्थाहरूबीच संवाद, समन्वय तथा प्रक्रियागत अनुभवहरूको आदान-प्रदान गर्ने महत्त्वपूर्ण अवसर प्रदान गर्ने बताए। यसबाट देशका लोकतान्त्रिक परम्पराहरूलाई सुदृढ़ बनाउन तथा विधायिकी संस्थाहरूको प्रभावकारी सञ्चालनका लागि सामूहिक प्रयासलाई अघि बढ़ाउन सहयोग पुग्नेछ।

बैठकमा सहभागी हुने पीठासीन अधिकारी तथा अन्य प्रतिनिधिहरूका लागि आवश्यक व्यवस्थाको समन्वय दिल्ली विधानसभा सचिवालयले गरिरहेको छ। प्रत्येक प्रतिनिधिमण्डलसँग समन्वय तथा शिष्टाचार सम्बन्धी व्यवस्थाका लागि एक जना तोकिएको सम्पर्क अधिकारी खटाइनेछ। समितिका सदस्यहरूलाई राज्य अतिथिको दर्जा प्रदान गरिएको छ र सोहीअनुरूप आवश्यक सुविधा तथा सुरक्षा व्यवस्था उपलब्ध गराइनेछ।

बैठकको समापनपछि समितिका सदस्यहरूले सञ्चारमाध्यमसँग कुराकानी गर्नेछन्। उनीहरूले छलफल, सिफारिस तथा प्रस्तावित एकरूप आदर्श नियमलाई अन्तिम रूप दिने आगामी प्रक्रियाबारे जानकारी साझा गर्नेछन्।

हिन्दुस्थान समाचार / भवानी थामी