गेजिङ, 06 अक्टूबर (हि.स.)। गेजिङका जिल्लापाल तेञ्जिङ डी डेञ्जोङ्पाले मङ्गलावर रिम्बीमा निर्माणाधीन पुनर्स्थापना केन्द्रको निर्माण कार्यको समीक्षा गर्नुका साथै राहत शिविरको निरीक्षण गरी त्यहाँको व्यवस्था र प्रभावित परिवारहरूको पुनर्स्थापनाका उपायमाथि छलफल गरे।
यस अवसरमा जिल्लापालसँग मुख्यमन्त्रीका विशेष कर्तव्य अधिकारी (राजनीतिक मामिला) कर्मा सुब्बा, क्षेत्र विधायकका विशेष कर्तव्य अधिकारी वसन्त तामाङ, पर्यटन विभागका विशेष कर्तव्य अधिकारी मिङ्मा लेप्चासहित अन्यको उपस्थिति रहेको थियो।
निर्माणाधीन पुनर्स्थापना केन्द्रको निरीक्षणको क्रममा जलापूर्ति, बिजुली र सरसफाइलगायतका अत्यावश्यक सुविधाहरूको व्यवस्थाबारे विस्तृत छलफल गरियो।
जिल्लापालले बिजुलीको आवश्यकतालाई ध्यानमा राख्दै सम्बन्धित अधिकारीहरूलाई विद्युतीकरणको कामलाई तीव्रता दिन निर्देशन दिए भने दिन-रात निर्माण कार्य जारी राखेको सुनिश्चित गर्न आवश्यकताअनुसार जनशक्ति परिचालन गर्न पनि आग्रह गरे।
उनले कृषि तथा बागवानी विभाग, गेजिङलाई 5,000 लिटर क्षमताका दुईवटा पानीका ट्याङ्की उपलब्ध गराउन निर्देशन दिए। सरसफाइसम्बन्धी कार्यजस्तै सोक पिट र शौचालयको निर्माण, पीडब्ल्यूडीद्वारा गरिनेछ। पुनर्स्थापना केन्द्र परिसरमा विद्युतीकरणको काम विद्युत् विभाग र आईटीआईले गर्नेछन् भने सेप्टिक ट्याङ्क र जलापूर्तिको काम आरडीडी बीएसी योकसमले गर्नेछ। आईसीडीएस सुविधाहरूसँग सम्बन्धित आवश्यकताहरूबारे पनि छलफल गरियो।
जिल्लापालले कामहरू सम्पन्न गर्न स्थानीय सहयोगको महत्त्वमाथि पनि जोड़ दिए। आवश्यकताअनुसार बाहिरबाट जनशक्ति ल्याउन सकिने भए तापनि काम समयमै सम्पन्न गर्न स्थानीय समुदायको सहभागिता र सहयोग पनि अपरिहार्य हुनेछ।
त्यसपछि टोलीले राहत शिविरको निरीक्षण गर्यो, जहाँ प्रभावित परिवारहरूको स्थायी बसोबासका सम्बन्धमा छलफल गरियो। टोलीले घर र जग्गा दुवै गुमाएका परिवारहरूका लागि उपयुक्त जग्गा पहिचान गरी उपलब्ध गराउने विषयमा विशेष जोड़ दियो।
मूल्याङ्कनअनुसार रिम्बीमा कुल 33 परिवार र सिङ्लिताममा आठ परिवार प्रभावित भएका छन्।
सम्बन्धित निकायहरूले भोलिदेखि नै तोकिएका कामहरू शुरु गर्नेछन्, जसमा पुनर्स्थापना केन्द्रमा विद्युत्, खानेपानी र सरसफाइको सुविधा सुनिश्चित गर्ने कार्यलाई तत्काल प्राथमिकता दिइनेछ।
जिल्ला प्रशासन र सम्बन्धित निकायहरूको समन्वयात्मक प्रयासको उद्देश्य पुनर्स्थापना केन्द्रको निर्माण कार्य समयमै सम्पन्न गर्नु र प्रभावित परिवारहरूलाई आवश्यक सुविधाहरू उपलब्ध गराउनु हो।
---------------
हिन्दुस्थान समाचार / बिशाल
