नयाँ दिल्ली, 0१ नोभेम्बर (हि.स.)। उपराष्ट्रपति सीपी राधाकृष्णनले आइतवार नयाँ दिल्ली स्थित तालकटोरा स्टेडियममा राष्ट्रिय अङ्ग प्रत्यारोपण खेल २०२६ को उद्घाटन गरेका छन्। यो आयोजनले देशभरिका अङ्ग प्रत्यारोपण गराएका व्यक्ति, अङ्गदाता, स्वास्थ्यकर्मी, उनीहरूका परिवार तथा सम्बन्धित क्षेत्रका हितधारकहरूलाई एकसाथ ल्याउँछ।
यस अवसरमा उपराष्ट्रपतिले दिवङ्गत अङ्गदाताहरूप्रति श्रद्धाञ्जली अर्पण गर्दै उनीहरूका परिवारप्रति गहिरो समवेदना व्यक्त गरे। अङ्गदाताहरूको निःस्वार्थ निर्णयले अरूलाई जीवनको दोस्रो अवसर प्रदान गरेको उनले बताए। उनले यी खेलहरूलाई साहस, दृढ़ सङ्कल्प, करुणा र जीवनको अमूल्य उपहारको उत्सव बताए।
कार्यक्रममा केन्द्रिय स्वास्थ्य तथा परिवार कल्याण राज्यमन्त्री प्रतापराव जाधव, लोकसभा सांसद बाँसुरी स्वराज लगायत विशिष्ट व्यक्तिहरू उपस्थित थिए। उपराष्ट्रपतिले ‘जिन्दगी दोबारा’ नामक पात्रो विमोचन गर्नुका साथै जर्मनीको ड्रेस्डेनमा आयोजित विश्व अङ्ग प्रत्यारोपण खेल २०२५ का पदक विजेताहरूलाई सम्मानित गरे।
कार्यक्रममा ५७० जना अङ्ग प्रत्यारोपण गराएका व्यक्ति तथा अङ्गदाताले एकैसाथ ताड़ासन गरेर विश्व कीर्तिमान कायम गर्ने प्रयास गरे। प्रयास सफल भएपछि आयोजकहरूलाई नयाँ दिल्ली स्थित विश्व अभिलेख पुस्तिकाका तर्फबाट प्रमाणपत्र प्रदान गरियो। उपराष्ट्रपतिले सहभागीहरूसँगै अङ्गदानको शपथ लिनुका साथै कबड्डी, टेबलटेनिस र ब्याडमिन्टनका प्रदर्शनी खेल समेत अवलोकन गरे।
उल्लेखनीय छ, रिनल केयर फाउन्डेशन, सर गङ्गाराम अस्पताल र राष्ट्रिय अङ्ग तथा तन्तु प्रत्यारोपण सङ्गठन (नोटो) को आयोजनामा दिल्लीको तालकटोरा इन्डोर स्टेडियममा शुरु भएको यस खेल महोत्सवमा ५७० जना अङ्ग प्रत्यारोपण गराएका खेलाड़ी सहभागी छन्। अङ्गदानप्रति जनचेतना बढ़ाउनु र ‘जिन्दगी दोबारा’ अर्थात् नयाँ जीवनको उत्सव मनाउनु यसको मुख्य उद्देश्य रहेको छ।
हिन्दुस्थान समाचार / भवानी थामी
